al-Kamil
Dr Al-Kamil Muhammad al-Malik (arabisch الكامل محمد الملك, Umschrift: al-Kāmil Muḥammad al-Malik, uf d Wält cho 1180; gstorbe 6. März 1238) isch dr viert Sultan vo de Ayyubide z Ägypte (1218-1238) gsi. Er gültet noch siim Unggle Saladin as ein vo de bedütendste mittelalterlige islamische Herrscher im Orient.
Läbe ändere
Früehji Johr und Damiettechrüzzug ändere
Noch em Dod vo siim Vater al-Malik al-Adil I. (1200-1218) isch dr al-Kamil si Nochfolger z Ägypte worde. D Regierig vo Syrie und Obermesopotamie het er siine Brüeder al-Muazzam bzw. al-Aschraf müesse überlo. Zerst het sich dr al-Kamil mit de Chrüzfahrer, wo z Ägypte glandet gsi sii, müesse usenandersetze. Wo die im November 1218 d Festig Damiette eroberet hai, het ene dr Al-Kamil Verhandlige abote. Die si aber vom päpstlige Legat und de italiänische Seerepublike abglehnt worde. Vor allem Venedig, Pisa und Genua hai ghofft, ass si noch eme Siig vo de Chrüzfahrer ihre Iifluss z Ägypte chönnte erwiitere. Wo d Chrüzzfahrer 1221 nach Kairo vorgstosse si, hai se alli Ayyubide zsämme bi al-Mansura ufghalte und wil d Nilschwemmi agfange het, hai si sech müesse zruggzieh.
Dr Kaiser Friedrich II. im Heilige Land ändere
Allerdings isch s Ayyubideriich bald wider bedroht gsi, wo dr Kaiser Friedrich II. zum Chrüzzug (1228-1229) ufbrochen isch. Wil dr al-Kamil vor allem mit dr Uswiitig vo siinere Macht in Syrie beschäftigt gsi isch, het er no vor em Afang vom Chrüzzug Verhandlige mit em Friedrich II. agfange. Under anderem dank däm siim diplomatische Chönne und siiner grosse Sympathii für en Islam und die orientalischi Wält isch im Februar 1229 der Friide vo Jaffa uf zäh Johr abgschlosse worde. In däm Verdrag isch Jerusalem zum Königriich Jerusalem cho und däm si Souveranität isch eso vo de Ayyubide-Herrscher bestätigt worde. D Stadt het aber vo de Chrüzfahrer nit dörfe befestigt werde. Noch däm Friidensverdrag, wo in der Gschicht zwüschen em Orient und em Okzident eimolig isch, het en Intensivierig vom materielle und kulturelle Usdusch agfange. Innepolitisch isch dä Verdrag vo dr arabische und vo dr christlige Siite stark agriffe worde, wil niemer en Erfolg für sii Siite drin gseh het und wil d Chrüzzugsgschicht bis denn no kei Chrüzzug ohni Blutvergiesse kennt het.
Die letzte Johr ändere
Noch däm Friide het dr al-Kamil mit em al-Aschraf us Obermesopotamie Damaskus chönne erobere, nochdäm ihre Brueder al-Muazzam 1228 gstorben isch. Währed dr Al-Aschraf s zentrale Syrie übercho het, het dr al-Kamil über Nordsyrie gherrscht und het s Riich vo de Ayyubide z Kurdistan wiiter chönne usdehne. Denn het er 1230 mit de Rum-Seldschuke zsämme d Choresmier besiigt, e Feldzug nach Anatolie im Johr 1234 isch aber nit glunge.
Dr Widerstand vo der ayyubidische Füehrigsschicht under siim Brueder al-Aschraf gege d Zentralisierigspolitik vom al-Kamil isch gwachse. Zwar het er 1238 no Damaskus chönne erobere und dr al-Aschraf entmachte, aber dr al-Kamil isch am 6. März 1238 gstorbe und dr Zentralstaat isch nit verwirklicht worde. Dr Nochfolger vom al-Kamil isch dr Malim al-Adil II. (1238-1240) gsi.
Weblingg ändere
|
Dä Artikel basiert uff ere fräie Übersetzig vum Artikel „Al-Kamil“ vu de dütsche Wikipedia. E Liste vu de Autore un Versione isch do z finde. |