Dialäkt: Baseldütsch

Dr Ambrosius Froben (1537-1595), au latinisiert Frobenius, isch ä Buechdrucker und Verleger us dr berüehmte Basler Druckerfamilie Froben gsi.

Läbe ändere

Dr Ambrosius Froben isch 1537 as Sohn vom Basler Buechdrucker und Verleger Hieronymus Froben und dr Anna Froben, geb. Lachner, z Basel uf d Wält cho.

Er het zsämme mit siim jüngere Brueder Aurelius d Froben Offizin wiitergfüehrt. im Johr 1557 isch er in d Safrezumft ufgnoh worde, zwei Johr vor em Aurelius. Berüehmt isch er worde mit em Druck vom hebräische Talmud. 1578 het er mit em Simon Jud zu Gembs ä Verdrag abgschlosse, ass er innerhalb vo drei Johr 1100 Kopie vom Talmud wurd mache, wien en 1547 dr Marco Antonio Giustiniani z Venedig druckt het, usser dä Schdelle, wo noch emä Beschluss vom Konzil vo Trient mit dr chrischdlige Religion unveriibar siige. Dr Kaiser Rudolf II. het s z erscht aber doch underem Druck vom Kardinal Santoro verbote, und denn zäh Johr spöter einewäg erlaubt.[1] Dr Froben het au anderi jüdischi Wärk veröffentligt, z. B. latinischi Übersetzige vo Teggscht vom Nachmanides und vom Maimonides[2] oder d Concordantiae Bibliorum Hebraeorum in 1581.

1586 het dr Ambrosius d Offizin siim Bueb, em Hieronymus, und siim Schwiigerson, em Jonathan Meyer (1557-1588), überlo und sich us em Gschäft zruggzooge. Im Johr 1587, wo em Ambrosius si Brueder und Partner, dr Aurelius, gschdorben isch, isch der Name Froben zum letschde Mol im Frankfurter Mässkatalog gschdande.

Dr Ambrosius Froben isch 1595 z Basel gschdorbe.

Familie ändere

Er isch mit dr Salome Rudin (1539-1610) verhürotet gsi und si hai zwölf Chinder gha, drunder dr Bernhard (1560-1588) wo mit dr Maria Magdalena Jakob verhürotet gsi isch aber chinderlos gschdorben isch, dr Hieronymus (1563-1611), wo für dr Herzog vo Würtemberg gschafft het und ledig bliiben isch, d Hanna (1565-1588) mit em Jonathan Meyer (1557-1588) verhürotet, d Margarethe (1565-1601) mit em Johannes Bauhoff, dr Johann Jakob (1571-1610) wo Wullewäber worden isch und d Verena Eichmann ghürotet het und dr Friedrich, ä Posamenter.[3]

Fuessnote ändere

  1. Gigliola Fragnito, Church, Censorship and Culture in Early Modern Italy, Cambridge University Press 2001, S.172f.
  2. Stephen G. Burnett, From Christian Hebraism to Jewish Studies: Johannes Buxtorf (1564-1629), Brill 1996, S.143
  3. Ambrosius Froben Archivlink (Memento vom 1. Februar 2014 im Internet Archive)