En Anthem isch en änglischi Choorkomposizioon mit gäistligem Teggst, wo in Gottesdienst in dr Anglikanische Liturgii verwändet wird. Im änglische Sproochgebruuch wird dr Begriff au allgemäin für e festlige Gsang verwändet (vgl. National Anthem – Nazionalhümne).

Gschicht ändere

S Wort „Anthem“ chunt über s altänglisch ontemn, antefn ‚abwäggligswiis gsungeni Komposizioon‘ vom griechischen ἀντίφωνα antiphona ‚Antwort in Stroofe‘. Es isch doodrmit ursprünglig s gliich Wort wie Antiphon.

Im ängere Sinn bezäichnet dr Begriff aber e spezielli Gattig vo dr Chillemuusig, bsundrigs im Gottesdienst vo dr Church of England, wo in dr Liturgii von ere en Anthem bim Morge- und äini vim Oobegottesdienst vorgsee isch („in choirs and places where they sing“). Anthems wärde vom Choor gsunge und underschäide sich in iirer Form und Komplexidäät vo de Hymns (Gmäindilieder) und Psalms (äifacheri Psalmodie). Die tradizionelli änglischi Chröönigszeremonie umfasst meereri Anthems. Die verdoonte Teggst stamme us dr Bible oder mänggisch us dr Liturgii. Es git Anthems für Solostimme (Verse Anthem), für dr gsamt Choor (Full Anthem) oder für e Kombinazioon us Choor- und Soloabschnitt (Full with verse). Anthems, wo e möögligi Instrumentaalbegläitig über s colla-parte-Spiil uusegoot, wärde as Symphony Anthems bezäichnet.

S Anthem het in dr anglikanische Liturgii öbbe dr gliich Stellewärt wie d Motette in dr katholische oder lutherische Liturgii. Es handlet sich aber um en äigeständigi, änglischi musikalischi Form, wo sit dr Gründig vo dr Church of England im 16. Joorhundert die zitgenössische Komponiste wie dr Thomas Tallis, dr Christopher Tye, dr William Byrd und dr Richard Farrant zu Komposizioone inspiriert het. Im 17. Joorhundert häi sich u. a. dr Orlando Gibbons, dr John Blow und dr Henry Purcell, im 18. denn dr William Croft, dr William Boyce, dr James Kent, dr James Nares, dr Benjamin Cooke und dr Samuel Arnold und schliesslig au dr Georg Friedrich Händel mit em Anthem abgee.

Anthems si in dr Church of England anstatt vo dr katholische „Votiv-Antiphon“ entstande, wo iire Blatz am Schluss vom Oobegebät (Komplet) het und gwöönlig dr Jungfrau Maria oder andere Häilige gwidmet isch.

Litratuur ändere

  • Peter Le Huray: „Anthem“. In: Stanley Sadie (Hrsg.): The New Grove dictionary of music and musicians (London: Macmillan, 1980) ISBN 0333231112
  Dä Artikel basiert uff ere fräie Übersetzig vum Artikel „Anthem“ vu de dütsche Wikipedia. E Liste vu de Autore un Versione isch do z finde.
  Dä Artikel basiert uff ere fräie Übersetzig vum Artikel „Anthem“ vu de änglische Wikipedia. E Liste vu de Autore un Versione isch do z finde.