Dr Arnulf vo Kärnte (* öbbe 850; † 8. Dezember 899) isch vo 887 bis 899 dr König vom Ostfrankeriich gsi, vo 894 bis 895 König vo Italie und vo 896 bis 899 dr römisch-dütsch Kaiser.

Arnulf von Kärnten
König vom Ostfrankeriich, Römische Kaiser

Siigel vom Arnulf: linggs öbbe 890, rächts öbbe 896
Regierigsziit Novämber 887 – 8. Dezämber 899
Chrönig zum Kaiser: 22. Februar 896, Rom
Titel König vo Italie
Uf d Wält cho 850
Gstorbe 8. Dezämber 899
Begrabe Chloster St. Emmeram z Rägesburg
Vorgänger Karl dr Dick
Nochfolger Ludwig das Kind
Verhürotet mit Ota

Läbe ändere

Dr Arnulf isch en illegitime Sohn vom Karolinger Karlmann gsi. Es isch möglig, ass dr Karlmann d Mueter vom Arnulf spöter doch no ghürotet het. Dr Arnulf isch z Moosburg uf dr Mosaburch ufgwachse. Er isch 876 zum Präfekt vo de östlige Marke ernennt worde, und isch noch em Dod vo siim Vater 880 Herzog vo Kärnte worde. Er isch in langi Kämpf gegen e Swentopluk vo Grossmähre und gege d Normanne verwigglet gsi.

Dr Arnulf isch im Novämber 887 noch Kämpf gege si Unggle und Vorgänger Karl dr Dick dr ostfränkisch König worde. 888 isch er noch Italie zoge, für zum sich d Köngswürde azeigne, wo noch em Dod vom Karl III. an dr Berengar I. gangen isch. Dr Berengar het ihm dr Lehnseid gschwore, het si Dron aber 889 an dr Herzog Wido (Guido) II. vo Spoleto verlore. Noch em Wido siim Dod het dr Arnulf 894 no einisch Oberitalie besetzt, het s aber 895 wider an dr Berengar und am Wido siim Sohn Lambert verlore. Erst noch dr Absetzig 896 vom Lambert (dä isch 897 wider an d Macht cho, aber im Johr druf scho gstorbe) isch dr Arnulf zum römische Kaiser gwehlt worde und no im gliiche Johr geges Ändi vom Februar het en dr Papst Formosus zum Kaiser krönt. Die Chrönig isch aber noch siim Abzug und em Dod vom Formosus vom Papst Johannes IX. 898 annulliert worde.

Im Johr 888 het dr Arnulf dr Odo vo Paris as dr westfränkisch König bestätigt, het s aber 893 akzeptiert, won er vom Karl em Iifältige ersetzt worden isch. 895 het er denn doch wider dr Odo understützt. Erst 898 het sich dr Karl noch em Odo siim Dod im Westfrankeriich duregsetzt.

891 het er bi Löwe d Wikinger entscheidend gschlage, was dene ihre Raubzüg es Ändi gmacht het.

Dr Arnulf het wohrschiinlig wie anderi Karolinger au an Epilepsii glitte. Er isch 899 am ene Schlaganfall gstorbe und isch im Chloster St. Emmeram z Rägesburg begrabe worde, wo au si Sohn, dr Ludwig das Kind, und si Frau, d Oda begrabe si.

E Gedänkdafele an en het s in dr Walhalla bi Rägensburg.

Chinder ändere

Dr Arnulf het vor 888 d Konradinerin Oda († noch em 30. November 903) ghürotet, und si hai e Sohn gha, dr Ludwig IV., das Chind (* 893; † 911). Dä isch noch em Dod vo siim Vater im Johr 900 König vom Ostfrankeriich worde.

Drzue het dr Arnulf mehreri uneheligi Chinder gha:

  • d Glismut (* um 866; † 26. April 924) ∞ öbbe 880 Graf Konrad der Elteri († 27. Februar 906 vor Fritzlar), dr Markgraf vo dr sorbische Mark, Vater vom spötere König Konrad I. us em Huus vo de Konradiner;
  • dr Zwentibold (* 870/871; † 900), König vo Lothringe 895, ∞ 897 Oda vo Sachsen († noch 952), Dochter vom Herzog Otto em Erlauchte (Liudolfinger);
  • d Ellinrat († noch 24. Mai 914), wo dr Engelschalk II., Markgraf vo dr Ostmark entfüehrt het; ihri Mueter het au Ellinrat gheisse und isch noch em 23. Mai 914 gstorbe;
  • dr Ratold (* wohrschiinlig 889), 896 parvulus filius.

Literatur ändere

  • Ernst Dümmler: Geschichte des Ostfränkischen Reiches. Dritter Band. Die letzten Karolinger, Konrad I. Wissenschaftliche Buchgesellschaft, Darmstadt 1960 (Nachdruck der 2. Auflage, Leipzig 1888).

Weblingg ändere

Vorgänger Amt Nochfolger
Karlmann Herzog vo Kärnte
880–899
Ludwig das Kind
Karl III. König vom Ostfrankeriich
887–899
Herzog vo Bayre
887–899
Lambert vo Spoleto König vo Italie
896–899
Ludwig der Blindi
Römische Kaiser (Gegekaiser)
896–899


  Dä Artikel basiert uff ere fräie Übersetzig vum Artikel „Arnulf_von_Kärnten“ vu de dütsche Wikipedia. E Liste vu de Autore un Versione isch do z finde.