Ufersteeig

Vo Ufersteeig (griech. ανάστασις, Infinitiv ανίστημι; lat. resurrectio) redet mä, wenn äi oder alli Doote noch oder us iirem Dood zum ene nöije Lääbe erweckt wärde. E Hufe Religione hoffe uf en Ufersteeig.

Überblick

Dr Usdruck isch in verschidnige Kulturkräis in dr Antike für underschiidligi religiöösi Vorstellige brucht worde. Mä cha die uf bestimmti Grundtüpe zruggfüere:

im Zarathustrismus und spööter im Islam

als Ufersteeig vom Liib vo alle Gstorbnige wo denn vo Gott im Ändgricht über Bösi und Gueti sortiert wärde (ethische Dualismus)

im Hellenismus, Platonismus und Gnostizismus

as Wiiderveräinigung vo dr Seel, wo dur e Dood vom Liib drennt worden isch, mit iirem Liib, wo jetz widerhärgstellt und nüme dr Verwääsig underworfe isch. Die Vorstellig cha sich mit eltere, egüptische oder färnöstlige Gedanke über e Wiidergeburt oder Seelewanderig verbinde. Si setzt d Unstärblikäit vo dr körperloose Seel vorus und begrift si as dr Kärn vom Wääse von ere Persoon und s Organisazioonszentrum vom Liib, wo däm sini Vergängligkäit überläbt.

im Juudedum

als göttligi Rettig vo de userweelte grächte Israelite us em Dood bzw. us em Ändgricht vo Gott zum ene nöije Lääbe uf dere Wält – oder als umfassendi Nöischöpfig vo dr Wält, wo alli Lääbewääse iibeziet und dr Dood überwindet (Bezug uf d Idee vo dr Grächtigkäit vo Gott und eschatologischi Häilsgschicht)

im Christedum

als Vorwägnaam vo dere Rettig us em Ändgricht an dr Persoon vom Messias Jesus Christus, wo gliichzitig dr zuekümftig Richder vo alle Lääbige und Doote isch und für die zuekümftigi Ufersteeig vo de Doote bürgt (christologischi Ändziterwardig). (Lueg: Uuferschtehig vom Jesus Christus)

Dä Artikel basiert uff ere fräie Übersetzig vum Artikel „Auferstehung“ vu de dütsche Wikipedia. E Liste vu de Autore un Versione isch do z finde.