Geopgraph vo Ravenna

De Geograph vo Ravenna (Geographus Ravennas, Anonymus Ravennas) isch de Verfasser von ere Weltbeschriibig, de Cosmographia, us em 6. Joorhundert gsii.

de Autor

Öber de Autor isch nu bikannt, as er z Ravenna uf d Welt choo isch, de Name und d Lebesdaate selber sind nöd öberliferet. Er het vom ene Gaistliche, won er bloss frater nennt, de Uuftraag öberchoo, e Kosmographii z schriibe, und isch mit ere groosse Woorschiinlichkait selber e Gaistliche gsii. As Quelle het er griechischi, latiinischi und gotischi Autore bruucht.

Cosmographia

D Cosmographia vom anonyme Geograph vo Ravenna umfasst föf Bänd. Im erste Band vertrett de Autor e biblisches Weltbild. D Erde sai e flachi Schibe und werd vom Ozean umflosse. Im Band II bischriibt er de Erdtail Asie, im Band III Afrika, im Band IV Europa und im Band V s Mittelmeer und de Ozean mit de Insle drinine. Er ornnet d Welt noch römische Provinze und usserhalb devo noch Länder. Im ganze chennt er rund 5000 Städt und 200 Flüss. De Tail öber Gallie und Germanie zaigt de Zuestand vo de früene Merowingerziit im 5. Jahrhundert. Spöter sind no chlinneri Ändrige aabroocht wore.

D Cosmographia zaigt vill Öberiistimmige mit de Peutingersche Tafle, offesichtlich hend baid Autore di gliich Voorlaag bruucht. Si selber isch um 1120 vom Geograph Guido vo Pisa bruucht wore. Vo de Cosmographia sind drai Abschrifte us em 13. und 14. Jh. erhalte.

Alamanorum patria

För d Bischriibig vom Land vo de Alemane (patria Suavorum que et Alamanorum patria) het er as Quelle de gotisch Glehrti Atanaridus aagee, wie au för Thüringe (Turringia) und Rhiifranke (Francia Rinensis), wo wie Burgund (Burgundia) und Italie (Italia) a d Alemane grenzet.

Er nennt öppe 40 alemannischi Städt, wo i vier Gruppe uuftailt werde chönnt. Di erste vier Städt sind Ligonas (Langres), Bizantia (Besançon), Nantes (?) und Mandroda (Mandeure), wobi er Besançon und Mandeure nomol bim Bischriib vo Burgund erwäänt. Denn chömet guet 15 Städt am Rhii (Renus) und Bodesee, aagfange mit Gormetia (Worms), denn u. a. Stratisburgo (Stroosburi), Bazela Basel), Constantia (Chostez) und endet mit Bracantia (Bregez). E zwaiti Gruppe vo öppe 15 Städt litt östlich bzw. südlich vom Rhii und fangt mit Alaia (Ehl) aa, goot öber Ziurichi (Züri) und Theodoricopolis (Chur) und endet bi Vermegaton (?). Die letzte acht Städt liged im ene andere Landestail, drunder sind Augusta (Augschburg), Ascapha (Aschaffeburg) und Uburzis (Würzburg). Vill Ortsnäme chöned aber nöd lokalisiert werde. Uuffällig isch, as de Geograph vo Ravenna d Alamannia vill witter fasst und Städt dezue rechnet, wie Langres, Besançon oder Würzburg, wo vermuetli nu churz zu de Alemanne ghört hend.

Büecher

• Reallexikon der germanischen Altertumskunde, Bd. 11: “Geographus Ravennas”
• Der Neue Pauly, Bd. 4: “Geographus Ravennas”

Weblink

 Commons: Ravenna Cosmography – Sammlig vo Multimediadateie