Dialäkt: Schwäbisch

Dr Herbert Liedecke (* 19. Juli 1912 z Stuegert, † 22. Sebdembr 1998) ischt a deitscher Konzertorganischt, Pianischt, Chorleidr, Orglsachvrstendiger ond Hochschuellehrer gwäa.

Aus seim Leaba ändere

Dr Herbert Liedecke ischt am 19. Juli 1912 als Soh vo-ma Archidekda z Stuegert uff d Welt komma. Nôch seim Abi, wo-nr am renommiirda Stuegerter Eberhard-Ludwig-Gymnasiom abglegt hôt, hôt’r uff Wonsch vo seim Vadder ôôgfanga, an dr Technischa Hochschuel Stuegert Archidekduur zo studiira, obwohl’r dô drzua ibrhaupt koi Luscht ghet hôt. Sei Kopf ischt emmr voll vo laudr Musik gwäa. Scho en seira Schuelzeit hôt’r mit-ra wahra Begeischtrong Ondrricht em Klaviir-, Orgl- ond Cello-Schbiila gnomma ghet, ond dui Liabhaberei hôt-en s ganz Leaba lang et losglassa. Drom hôt dr Liedecke nôch-em virda Semeschtr s Archidekduur-Studiom an da Nagl ghengt, om druff bei seim Landsmôô Hermann Keller (1885 bis 1967) en seira Hoimetstadt Kirchamusik zo studiira. Dô drbei hôt’r sei schbätra Ehefrau Eva Hölderlin kennaglernt, wo-nr 1942 gheiradet hôt. En dera Ehe send drei Kender uff d Welt komma, zwoi Mädla ond oin Bua. Schbätr hôt’r sei Studiom an dr Akademii fir Kircha- ond Schuelmusik en Berlin beim Dom-Organischda Fritz Heitmann (1891 bis 1953) fortgsetzt.

Sei erschda Ôôstellong als Kantor ond Organischt hôt dr Liedecke 1938 an dr Stadtkirch vo Stuegert-Feierbach kriagt. 20 Jôhr drnôch hôt’r zor Markuskirch ond 1970 zor Stiftskirch, dr evangelischa Hauptkirch vo seira Hoimetstadt, gwechslet. Hauptsächlich sei Orglschbiil ischt so perfekt gwäa, dass’r em Lauf dr Zeit zo-ma arg gfrôgda ond weitgreisda Konzert-Organischta wôrra ischt. Oft hend d Leit sei elegants Musiziira au vôr-em Radio, uffzoichnet vom Siddeitscha Rondfonk, vrfolga kenna.

Nôch-em Zwoida Weltkriag hôt s Land Bada Wirdaberg beschlossa, an seim Hochschuel-Inschdidut fir Musikerzihong z Drossenga a Abdeilong fir Kirchamusik eizorichda. Dô drbei isch dr Liedecke vo 1947 bis 1950 maßgeablich am Uffbau beteiligt gwäa. 1950 hôt’r a Stell als Orgl-Lehrer an dr Staatlicha Hochschuel fir Musik ond darstellende Konscht en Stuegert kriagt. 13 Jôhr schbätr hôt-en dui Hochschuel zom Professr ond Leidr vo dr Abdeilong Kirchamusik ernannt. Des Amt hôt’r bis ens Jôhr 1976 ausgiabt. Sei ôôschliaßenda Pensioniirong hôt-em abr noh koin Ruhestand bescheert. Er ischt weidr en dr Weltgschicht romgreist ond hôt Orglkonzert gäa. Ond en de wenige Zeida, wo-nr drhoim vrbrôcht hôt, ischt’r noh als Orgllehrer aktiv gwäa. Des älles ischt so lang ganga, bis-en a schwera Kranket drô ghendret hôt, seine Liablengsbeschäfdigonga weidrhin auszoiaba. Am 22. Sebdembr 1998 schliaßlich hôt’r seine Auga fir emmr gschlossa. 86 Jôhr alt isch’r wôrra. Sei ledschda Ruah hôt’r uff-em Alda Friidhof vo Stuegert-Rohr gfonda.

Quell ändere

Elsie Pfitzer: „Halleluja! Gott zu loben bleibe meine Lebensfreud!“ Herbert Liedecke zum 100. Geburtstag, an Uffsatz en de Württembergische Blätter für Kirchenmusik, Heft 6/2012, S. 21 bis 22, ISSN 0177-6487

Weblink ändere

Herbert Liedecke zum 100. Geburtstag