Dr Julius Nepos (* um 430; † 480) isch 474/475 dr letscht Kaiser vom Weströmische Riich gsi, wo vom oströmische Kaiser anerkennt worde isch.

Julius Nepos
Kaiser vom Weströmische Riich
Tremissis vom Kaiser Julios Nepos
Regierigsziit Juni 474 – August 28, 475 (z Italie)
475 – 480 (z Dalmazie)
Name Flavius Julius Nepos
Uf d Wält cho öbbe 430
Gstorbe 25. April 25, 9. Mai oder 22. Juni 480
Dodesort Split, Dalmazie
Vorgänger Glycerius
Nochfolger Romulus Augustulus

Lääbe ändere

Dr Julius Nepos isch sit 468 as Noochfolger vo sim Unggle Marcellinus magister militum Dalmatiae gsi und het eso e milidäärischi Schlüsselstellig an dr Nootstell zwüsche West- und Ostrom bsetzt. Dr Kaiser Leo I. het em äini vo sine Niesse zur Frau gee und no churz vor sim Doode 473 dr Ditel „Patricius“. Es isch mööglig, ass scho im Früelig 474 s nöije oströmische Herrscherkollegium Leo II. und Zenon dr Nepos z Ravenna zum „Caesar“ gege dr machtloosi weströmischi Kaiser Glycerius erhoobe het. Wo dä abgsetzt worde isch, het dr Nepos am 24. Juni z Rom dr Ditel „Augustus“ aagnoo.

Si Herrschaft isch aber dur e Armeemäister Orestes gfäärdet gsi, wil dä sälber über s Riich het welle herrsche. Dr Orestes het dr Julius Nepos im Oktober 475 us Rom gjagd in d Brovinz Dalmatia. Er het denn si Soon Romulus Augustulus zum Kaiser lo usrüefe. Dr Julius Nepos het vo siner Residänz Salona us brobiert, Iifluss uf s Riich z nee. Für d Oströmer, d. h. dr Kaiser Zenon, wo 20 Möönet lang abgsetzt gsi isch, isch dr Nepos dr legitimi weströmischi Kaiser bliibe, au wenn die bäide Geegekaiser Romulus in Westrom und Basiliskos in Ostrom sich offebar geegesitig anerkennt häi.

Im August 476 het dr Odoaker Romulus Augustulus abgsetzt und s Weströmische Riich, wo scho vorhär grösstedäils in meereri germanisch-romanischi Riiche zerfalle gsi isch, isch ändgültig undergange. Italie isch under dr Herrschaft vom Odoaker bliibe, wo sich zum König vo Italie het lo usrüefe und die kaiserlige Insignie uf Konstantinopel gschickt het. Dr Julius Nepos het bis zu siner Ermordig im Joor 480 z Dalmazie gherrscht. Mä wäiss nit, öb hinder em Attentaat gegen en si abgsetzt Vorgänger Glycerius oder dr Odoaker gsteckt het. Nominell si d Germaneriich im Weste no für Joorzäänt under der Oberhohäit vom oströmische Kaiser gstande.

Liddratuur ändere

  • Alexander Demandt: Die Spätantike. 2. Uflaag. Münche 2007.
  • Dirk Henning: Periclitans res Publica. Kaisertum und Eliten in der Krise des Weströmischen Reiches 454/5-493. Stuttgart 1999.
  • Arnold Hugh Martin Jones: The Later Roman Empire 284–602. A Social, Economic and Administrative Survey. 3 Bänd, Oxford 1964, S. 244 f. (Noochdruck in zwäi Bänd, Baltimore 1986).

Weblingg ändere

  Commons: Julius Nepos – Sammlig vo Multimediadateie


  Dä Artikel basiert uff ere fräie Übersetzig vum Artikel „Julius_Nepos“ vu de dütsche Wikipedia. E Liste vu de Autore un Versione isch do z finde.