Modalverb
| Dialäkt: Ùndertòggeborg |
Modalverb sind Zitwörter wo de Modus vomene andere Verb veränderet, maist inere Bidütig vo Zwang, Erlaubnis, Wille oder Fähigkait. S Hoptverb stoot debi im Infinitiv oni as Präpsition z vorane stoot. Si chömet i allne Germanische Sprooche vor und wiiset Bsunderhaite i de Konjugation uuf. Well si im Präsenz wie Präterita konjugieret, nennt mer si au Präteritopräsentia. Zu dene ghört ono s Verb wüsse, degege ghört s Modalverb wöle nöd dezue, es flektiert nämli as anzigs Verb im Präsenz wienen Konjunktiv.
Modalverbe im Alemannische ändere
Im Alemannische gitses sechs Modalverbe: chöne, möge, wöle, söle, töre/dörfe, müesse. Vo dene hend ainigi Churzforme, wo för Churzverbe typisch sind. S Partizip Präteritum luutet immer gliich wie de Infinitiv und di erst Person Singular und die dritt Singular sind identisch.
| Infinitiv | Singular | Plural | Subjunktiv | Konjunktiv | Partizip | Modifikation vom Hoptverb |
| chöne | cha : chasch : cha | chöned / chönd | chön(i) | chönt | chöne | Fähigkait (si cha Alemannisch rede) |
| möge | mag : magsch : mag | möged | mög(i) | mögt / möcht | möge | Fähigkait (er mag 50 Kilo lupfe); Wile (er mag nöd cho) |
| töre | tar : tarsch : tar | töred | tör(i) | törscht | töre | Erlaubnis (du tarsch singe) |
| dörfe | darf : darfsch : darf | dörfed | dörf(i) | dörft | dörfe | Erlaubnis (du darfsch singe) |
| müesse | mue(s) : muesch : mue(s) | müend | mües(i) | müesst | müese | Zwang (er mue schaffe) |
| söle | söll : söllsch : söll | söled | söll(i) | sött | söle | schwache Zwang (i söll schriibe) |
| wöle | will : wilsch / wit : will | wönd | wöll(i) | wött | wöle | Wile (mer wönd lese) |
| D Forme vo dere Liste sind im Toggeborger Tielekt. | ||||||
Di baide Verbe töre und dörfe hend früener zwoo verschidnig Bidütige gha, debii het dörfe d Erlaubnis uusdruckt und töre Widerstand gege Zwang: ich tar singe het öppe i trau z singe (obwoll i nöd darf) bidütet (vgl. Englisch: I dare sing).