Nicola Antonio Porpora

Dr Nicola Antonio Porpora (* 17. August 1686 z Neapel; † 3. Merz 1768 z Neapel) isch en italiänische Komponist und Gsangsleerer gsi. Er isch bekannt gsi drfür, ass er e Virtuos in dr italiänische Arie isch.

Dr Nicola Porpora

Lääbe und Wärk

Am Conservatorio Sant' Onofrio z Neapel het er d Kastrate Antonio Uberti, wo sich zu sine Eere Porporino gnennt het, Farinelli (Carlo Broschi) und Caffarelli (Gaetano Majorano) underrichdet, wo spööter berüemt worde si. 1733 isch dr Porpora uf London iiglaade worde, und het dört die künstlerischi Läitig vo dr Opera of the Nobility übernoo, wo erst grad gründet und vom Prince of Wales proteschiert worde isch. Er isch so dr Konkurränt vom Georg Friedrich Händel worde, wo s Opereundernääme von em, die zwäiti Royal Academy of Music vom Köönig Georg II. understützt worde isch.

1737 het d Opera of the Nobility Bankrott gmacht und dr Porpora isch uf Neapel zrugg. 1739 isch die überarbäiteti Fassig vo Semiramide riconosciuta mit groossem Erfolg im Teatro San Carlo ufgfüert worde und no im gliiche Joor isch dr Porpora Porpora dr Erst Leerer am Conservatorio di Santa Maria di Loreto worde.

1744 isch dr Porpora uf Dresde und isch dört dr Gsangsleerer vo dr Brinzässin Maria Antonia Walpurgis vo Bayre und Kapellmeister worde. 1752 isch er uf Wien, wo dr jung Joseph Haydn e Zitli für en as Kammerdiener gschafft het. Er het käini Ufdrääg für Opere überchoo und au sini Sonate si nid erfolgriich gsi. So isch er 1760 uf Neapel zrugg und het dr Boste vom Maestro di cappella am Conservatorio di Santa Maria di Loreto übercho. Er het en Opere, Il trionfo di Camilla, gschriibe, wo aber so schlächt achoo isch, ass er ufghöört het Opere z komponiere. Im Joor druf het er si Boste am Konservatorium ufgee.

1768 isch dr Nicola Porporo arm und elei z Neapel gstorbe.

Litratuur

• Franz Haböck: Die Gesangskunst der Kastraten. Universal-Edition A. G., Wien 1923.
• Franz Haböck: Die Kastraten und ihre Gesangskunst, eine gesangsphysiologische kultur- und musikhistorische Studie. 1. Ausgabe, Deutsche Verlags-Anstalt, Stuttgart 1927.
• Richard Somerset-Ward: Angels & monsters: male and female sopranos in the story of opera, 1600-1900. Yale University Press, New Haven 2004, ISBN 0-300-09968-1.
• Hubert Ortkemper: Engel wider Willen. Die Welt der Kastraten. Henschel-Verlag, Berlin 1993, ISBN 3-89487-006-0.
• Cecilia Bartoli: Sacrificium. (Doppel CD und Buech), Decca Records 2009.

Weblingg

• Gmeinfreji Note vu Nicola Antonio Porpora im International Music Score Library Project
• Porpora-Projekt, Lääbenslauf und Wärkeverzäichnis uf Änglisch

Dä Artikel basiert uff ere fräie Übersetzig vum Artikel „Nicola_Antonio_Porporo“ vu de dütsche Wikipedia. E Liste vu de Autore un Versione isch do z finde.