S Dörfli odär s Niderdorf (uf Hochtüütsch Niederdorf) isch s Viärtäl rund um d Nidärdorfstrass i dä Altstadt vo Züri.

Blick uf d Limät und s Dörfli
S Zumfthuus zur Schmiidä im Dörfli

Uusdeenig ändere

S Niderdorf hät d Form vomäne spitzwinklige Drüüegg. De Spitz liit im Norde am Cäntral. Di öschtlichi Gränzä bildät d Limät beziänigswys s Limmätquai, d Weschtgränze dä Säilergrabe, wo zur alte Stadtbefeschtigung ghört hät. D Südgränze gaat bi de Stüüssihoofstatt dure; südlich devoo liit d Määrtgass, und na südlicher s Oberdorf.

Di allgemäiner Bezäichnig Dörfli wird au für di gsamt Altstadt öschtlich vo dä Limmät bruucht, das häisst s für s Gebiet um s Niderdorf plus s Raatshuusquartier und s Oberdorf bis zum Bellvue. S äigätlich Herz vom Dörfli bildät dä Hirschäplatz, wo all Jahr am 11.11. um 11:11 au s Monschtärkonzert vo dä Fasnacht startät.

Öschtlich vom Dörfli uf äm Weschthang vom Züriberg liged d Uni und d ETH, wo vom Dörfli uus mit äm Polybähnli, änäre Standsäilbaan erräicht werdä cha. Drum isch s Dörfli au bi dä Zürcher Schtudänte seer beliäbt.

Vercheer ändere

S ganz Quartier isch äi grossi Fuässgängerzoone mit Uusnaam vom nördliche Täil vom Limmätquai, dä Mühligass, dä Zähringerstrass und äm Zäringerplatz sowie natürli äm Säilergrabe. Uf äm Limmätquai vercheeräd s Viäri- und s Füfzäni-Tram, uf äm Säilergrabe dä Drüüer und dä Einedrysgi-Trolleybus, wo früäner ä Mal s Tram Numärä Äis gsy isch.

Strassakafi und Nachtläbe ändere

S Dörfli isch vor alläm wäge sini ville Strassekafis, Kabaretts und Nachtklüb beliäbt. Früäner isch s Dörfli als Zäntrum vom Zürcher Strassestrich berüchtigt gsy, aber sit dä 80är-Jaar hät sich s Miliö mee und mee a s Sihlquai und a d Langstrass verlagärät.

D Zürcher Zentralbiblioteek ändere

Am Predigerplatz zmitzt im Dörfli befindät sich i dä Rümlichkäite vom früänäre Chloschter zum Prediger d Zürcher Zentralbiblioteek, wo gmäinsam vom Kanton, dä ETH und dä Uni betribe wird. Di ehemaligi Chloschterchile diänt wyterhin als Gotteshuus.

Luäg au ändere

Weblink ändere

  Commons: S Dörfli – Sammlig vo Multimediadateie