Pirwa

De Pirwa isch de hethitischi und vermuetli o de luwischi Rossgott. Er bildet mit de Göttin Hassusara (‘Königi’) und em Torgenius Askasepa e Triade. Er zaigt chriegerischi Züüg und lait Angst is Herz. Sis Götterbild isch e Maa, wo ufeme Ross stoot und i de rechte Hand Zügel, i de lingge e Paitsche hebt. Er hett i de Berge e Felshailigtum ghaa, mit aigne Landgüeter, wo Ross, Berggaisse und Schööff waidet.

De Pirwa ghöört zom Götterchrais vo Kanis und isch drumm im südöstliche Anatolie dihai. O anderi Gotthaite us dem Umfeld sind mit Ross verbunde, so d Kamrusipa und d Maliya. Da isch uuffälig, well s Ross i de hethitische Religioo kai Bidüttig hett im Gegesatz zom Stier. S werd agnoo as d Vereerig vom Ross en indogermanisches Erb isch, wo bi de Luwier erhalte bliben isch, wääred d Hethiter d Vereerig vom Stier vo de anatolische Bivölkerig, bsunders vo de Hattier, öbernoo hend. So isch au de luwischi Wettergott Tarhunza mit Ross verbunde, de hethitischi Tarhunna aber mit Stiere.

Literatur

• Volkert Haas: Geschichte der hethitischen Religion; HdO 1,15. Brill, Leiden 1994, ISBN 978-9-004-09799-5.
• Einar Schuler: Kleinasien. Die Mythologie der Hethiter und Hurriter, i: Hans Wilhelm Haussig: Götter und Mythen im Vorderen Orient. Ernst Klett Verlag, Stueggert 1965.