D Qin-Dünastii
D Qin-Dünastii (chin. 秦朝, Qín Cháo, W.-G. Ch’in Ch’ao) isch die ersti Dünastii vom chinesische Kaiserriich gsi und het vo 221 bis 207 v. d. Z. gherrscht.
Gschicht ändere
D Qin-Dünastii isch im Staat Qin entstande. Das isch dr westligst vo de siibe Staate gsi, wo in dr Zit vo de kämpfende Riich um d Vorherrschaft grunge häi. De Qin isch s bis zum Joore 221 v. d. Z. glunge, alli andere Riich z eroobere und so zum erste Mol s ganze Territorium, wo Chinese gläbt häi under äinere Chroone z veräinige. Das isch dr Höhepunkt von ere Entwicklig gsi, wo scho in de Joorhundert vorhäär aagfange het und äins vo de wichdigste Eräigniss in dr Gschicht vo China isch.[1][2] Noch dr Äinigung vom Riich het dr Qin-Köönig Zheng dr Kaiserditel aagnoo; er isch dorum as Qin Shihuangdi bekannt. As dr äigentlig Archidekt vom Äihäitsriich gältet aber si Kanzler Li Si. S Territorium, wo d Qin-Dünastii drüber gherrscht het, isch vil gröösser gsi as das, wo iiri Vorgänger, wie öbbe d Shang- oder Zhou-Dünastii kontrolliert häi.
D Qin-Dünastii het nime e baar Joor existiert, aber die ghööre zu de Abschnitt in dr chinesische Gschicht, wo politisch am kreativste gsi si.[3] D Qin häi uf dr Filosofii vom Legalismus d Grundzüüg vom chinesische Staatswääse ufbaut, wo denn Joorhunderti lang bestande het: die kaiserligi Bürokratii, die süstematischi Erfassig vo dr Bevölkerig und de Ländereie zum sä chönne bestüüre, d Legitimierig vom Kaiserdum, dr Bau von ere Muure zum Schutz gege d Völker vo Innerasie und d Verwändig vo äihäitlige Määss, Schrift und Wäärig im ganze Riich. Nit zletscht chunnt dr Naame China vom Wort Qin.[4]
Noch em Dood vom erste Kaiser im Joor 210 v. d. Z. si im ganze Land Unrueje usbroche. Drotz iirer milidäärische Sterki het dr Bürgerchrieg, wo usbroche isch, d Qin zum Fall brocht. Im Joor 207 v. d. Z. het dr Rebell Xiang Yu dr dritt Qin-Kaiser Ziying lo hiirichte, und churz nochääne het dr Liu Bang d Han-Dünastii gründet.
Historischi Bewärtig ändere
Lang het die chinesischi Gschichtsschriibig d Qin-Dünastii as barbarisch und milidarischdisch verurdäilt. Au under westlige Wüsseschaftler häi d Qin lang as e tüpischs Bischbil für e Totalitarismus gulte. D Analüüse vo archeologische Fund het aber in de letschte Joorzäänt s Bild usgwoogniger gmacht.[5]
D Kaiser vo der Qin-Dünastii ändere
| Postume Naame (Shi Hao 諡號) |
Geburtsnaame | Regierigszit | |
|---|---|---|---|
| Konvenzion: "Qin" + Postume Name | |||
| Zhaoxiang (昭襄 Zhāoxiāng) |
Ying Ze (嬴則 yíng zé oder 嬴稷 yíng jì) |
255 v. Chr.–250 v. Chr. | |
| Xiaowen (孝文 Xiàowén) |
Ying Zhu (嬴柱 yíng zhù) |
250 v. Chr. | |
| Zhuangxiang (莊襄 Zhuāngxiāng) |
Ying Zichu (嬴子楚 yíng zi chǔ) |
249 v. Chr.–247 v. Chr. | |
| Qin Shihuangdi (始皇帝 Shǐhuángdì) |
Ying Zheng (嬴政 yíng zhèng) |
246 v. Chr.–210 v. Chr. | |
| Er Shi Huangdi (二世皇帝 Èr Shì Huángdì) |
Ying Huhai (嬴胡亥 yíng hú hài) |
209 v. Chr.–207 v. Chr. | |
| Dr Ziying wird vilmol mit sim Geburtsnaame oder as "Qin Wang Ziying" bezäichnet. (秦王子嬰 qín wáng zi yīng) | |||
| Sān Shì Huángdì (三世皇帝 Sān Shì Huángdì) |
Ying Ziying (嬴子嬰 yíng zi yīng) |
207 v. Chr. | |
Litratuur ändere
- Bodde, Derk: The state and empire of Ch'in, in: The Cambridge History of China, Band 1 The Ch'in and Han Empires, 221 B.C.-A.D.220, Cambridge 1986, ISBN 978-0-521-24327-8.
- Lewis, Mark Edward: The Early Chinese Empires: Qin and Han, London 2007, ISBN 978-0-674-02477-9.
- Helwig Schmidt-Glintzer: Geschichte Chinas bis zur mongolischen Eroberung 250 v. Chr. – 1279 n. Chr. Oldenbourg, München 1999, ISBN 3-486-56402-1.
- Michael Strähle: Bücherverbrennungen und Zensur im alten China und ihre Folgen. in: Mitteilungen des Vereins Österreichischer Bibliothekare Wien 56.2003, ISSN 1022-2588, S. 41-42.
- Jacques Gernet: Die chinesische Welt. Suhrkamp, Frankfurt 1994, ISBN 3-518-38005-2.
Weblingg ändere
Commons: Qin-Dynastie – Sammlig vo MultimediadateieFuessnoote ändere
- ↑ Bodde, Derk: The state and empire of Ch'in, in: The Cambridge History of China, Band 1 The Ch'in and Han Empires, 221 B.C.-A.D.220, Cambridge 1986 (ISBN 978-0-521-24327-8), S.69
- ↑ Helwig Schmidt-Glintzer: Geschichte Chinas bis zur mongolischen Eroberung 250 v. Chr. – 1279 n. Chr., Münche 1999, S.18
- ↑ Rankin, Mary B.; Fairbank, John K.; Feuerwerker, A., Perspectives on modern China's history, in: The Cambridge History of China, Band 13, Republican China 1912-1949 Part 2, Cambridge 1986 (ISBN 0-521-24338-6), S.49
- ↑ Helwig Schmidt-Glintzer: Geschichte Chinas bis zur mongolischen Eroberung 250 v. Chr. – 1279 n. Chr., Münche 1999, S.13 und S.97
- ↑ Helwig Schmidt-Glintzer: Geschichte Chinas bis zur mongolischen Eroberung 250 v. Chr. – 1279 n. Chr., Münche 1999, S.19
|
Dä Artikel basiert uff ere fräie Übersetzig vum Artikel „Qin-Dynastie“ vu de dütsche Wikipedia. E Liste vu de Autore un Versione isch do z finde. |
| D Epoche vorhäär Zit vo de kämpfende Riich |
Zitdaafele vo dr chinesische Gschicht | D Epoche noochhäär Han-Dünastii |