SWR Sinfoniiorcheschter Bade-Bade un Frybeg

S SWR Sinfoniiorcheschter Bade-Bade un Frybeg (dt. SWR Sinfonieorchester Baden-Baden und Freiburg) isch eis vu zwei Sinfoniiorcheschter vum Sidweschtrundfunk gsii. Syt dr Grindig 1946 isch s fir zahlrychi Uruffierige vu Neje Musik bekannt un s giltet as eis vu dr beschte Orcheschter vu Dytschland. Dr Schefdirigänt isch dr Sylvain Cambreling, Ehredirigänt un ständige Gaschtdirigänt dr Michael Gielen. Ab 1999 het s Orcheschter syy Sitz im Kunzärthuus Frybeg ghaa. Zue dr Spilzyt 2016/17 isch s Orcheschter mit em Radio-Sinfoniiorcheschter Stuegert zum SWR Symphonieorcheschter fusioniert wore, wu sy Sitz z Stuegert het.

Gschicht ändere

Grindet am 1. Februar 1946 z Bade-Bade unter em Name Filharmonischs Orcheschter vum Sidweschtfunk (dt. Philharmonisches Orchester des Südwestfunks) isch s no im nämlige Johr in Großes Orcheschter vum Sidweschtfunk (dt Großes Orchester des Südwestfunks) umgnännt wore. Unter em erschte Schefdirigänt Hans Rosbaud isch scho anne 1950 mit em erschte Uftritt bi dr Donaueschinger Musikdäg fir zytgnessischi Tonchunscht dr Grundstei gleit wore fir di hitig Usrichtig vum Orcheschter. Syterhär het s Orcheschter uugfehr 400 Wärch urufgefiert. 1966 isch s Orcheschter wider umgnännt wore in Sinfoniiorcheschter vum Sidweschtfunk (dt. Sinfonieorchester des Südwestfunks). 1996 isch dr Umzug in s Kunzärthuus Frybeg erfolgt. Mit dr Verschmelzig vum SDR un em SWF zum SWR het s Orcheschter anne 1998 syy hitige Name iberchuu. Syt 1949 unternimmt s Orcheschter au regelmäßig wältwyti Kunzärtturnee, zem Byschpel het s zum 250. Geburtsjubiläum vum Mozart am 27. Jänner 2006 s Fechstkunzärt im Wiener Konzärthuus gstaltet. Am 1. Februar 2006 het s Orcheschter syy 60. Geburtstag gfyrt mit eme Feschtkunzärt im Kunzärthuus Frybeg.

Dirigänte ändere

 
Färnsehufzeichnig mit em Sinfoniiorcheschter vum Sidweschtfunk 1964. Dirigänt Ernest Bour, am Klavier Rudolf Firkušný

1948–1962 ändere

Unter em Hans Rosbaud het s Orcheschter Uruffierige mit Wärch vum Paul Hindemith un em Igor Strawinski, wu bedi au as Gaschtdirigänte ufträtte. 1958 het dr Pierre Boulez syy Karriere aagfange as Dirigänt z Bade-Bade as artist-in-residence.

1964–1979 ändere

Dr Schefdirigänt Ernest Bour dirigiert näbe Lontano vum György Ligeti iber 100 Uruffierige, bhaltet aber au s klassisch Programm byy.

1980–1986 ändere

Mit em Kazimierz Kord widmet sich s Orcheschter dr oschteuropäische Musik mit Tschaikowski, Schostakowitsch un Lutosławski.

1986–1999 ändere

Unter em Motto „Musik ist unteilbar“ gryft dr Michael Gielen s Konzäpt vu dr Glychberächtigung vu dr klassische Musik un dr Modärni uf un presäntiert näbe wytere Uruffierige vum Mathias Spahlinger bis Mauricio Kagel au Komplettyyspilige vu dr Sinfonie vum Beethoven un vum Mahler.

1999–2011 ändere

Näbe dr Vorliebi fir dr Mozart un dr Haydn spilt dr Sylvain Cambreling mit em Orcheschter Zykle vum Olivier Messiaen un em Hector Berlioz yy un erwyteret s franzesisch Repertoire mit weniger bekannte Komponischte vu Rameau bis Grisey.

2011–2016 ändere

Dr François-Xavier Roth fiert s Profil vum Orcheschters kunsequänt wyter: Mit em Leitsatz Wir spielen Neue Musik aus allen Zeiten stellt er in dr Konzertprogramm Wärch vu Beethoven un Boulez, Strauss un Rihm, Debussy un Ligeti gegeniber. Zue dr Uruffierige cheme zahlryche Wideruffierige vu Wärch, wu s SWR Sinfoniiorcheschter in dr vergangene Johrzehnt urufgfiert ghaa het. Zue dr Spilzyt 2016/17 isch s Orcheschter mit em Radio-Sinfoniiorcheschter Stuegert zum SWR Sinfoniiorcheschter fusioniert wore, wu sy Sitz z Stuegert het.

Weblink ändere

  Dä Artikel basiert uff ere fräie Übersetzig vum Artikel „SWR_Sinfonieorchester_Baden-Baden_und_Freiburg“ vu de dütsche Wikipedia. E Liste vu de Autore un Versione isch do z finde.