Schauinslandbahn
Koordinate: 47° 56′ 9,6″ N, 7° 51′ 55,6″ O
| Chänndate |
|
D Schauinslandbahn isch di lengscht Gondelbahn vu Dytschland. Si fiert vu dr Dalstation z Horbe bi Fryybeg uus uf dr Gipfel vum Schauinsland. Doderbyy iberwindet si uf ere Lengi vu 3.600 Meter e Hecheunterschiid vu 746 Meter. Di 37 schaffnerlose Kabine chenne bis zue 700 Mänsche in dr Stunde dransportiere, pro Johr sin s rund 240.000 Fahrgescht.
Gschicht ändere
Scho anne 1893 het dr dertig Oberburgermeischter vu Fryybeg, dr Otto Winterer, e Bahn uf dr Fryybeger Huusbärg, welle böue. Anne 1925 het d Stadt doderfir e Schauinslandbahn-Studiegsellschaft grindet, wu drej Johr speter, 1928, e Aktiegesellschaft drus woren isch, wu d Stadt d Mehrheit gha het. Aafangs Mai 1929 isch dr Grundstei zue däm Großprojäkt gleit wore, wu 2,15 Millione Ryychsmark gchoschtet het. Noch ere drejjehrige Böuzyt dur d Firma Ernst Heckel GmbH vu Saarbrücke isch d Schauinslandbahn, as erschti Personeseilbahn vu dr Wält noch em Umlaufprinzip, am 17. Juli 1930 in Bedriib gnuu wore. Dr Architekt isch dr Robert Mühlbach (1875-1975) gsi. Di zeh Großruumkabine (23 Persone bzw. 1.915 kg zuelessig Gsamtgwicht) vu dr Zweiseilumlaufbahn, wu friejer e Schaffner mitgfahren isch, hän vo do ab Turischte no Fahrblan uf dr Bärg brocht. Doodemol sin acht Kabine glyychzytig uf dr 3.600 Meter lange Strecki symmetrisch unterwägs gsi.
Am 26. Novämber 1932 het e dragisch Uuglick dr Bedriibsablauf vu dr Bahn iberschattet, wu bis dert ohni Probläm gangen isch. Dur e schwäre Bedienigsfähler vun eme Schaffner isch nume ei Zugseil an d Bahn kupplet wore. Doderdur isch d Kabine iber e aabeghejt Zugseil grote un isch churz vor dr Dalstation vum Dragseil gheblet wore. D Kabine isch 13 Meter in d Diefi gstirzt, doderbyy sin drej Persone um s Läbe chuu (au dr Schafner). No umfangryyche Untersuechige, wu di grundsätzlig Sicherheit vu dr Bahn bstetigt hän, het dr Bedriib im Jänner 1933 wider chenne ufgnuu wäre. Syterhär het s kei Uufall me gee.
Im Zweete Wältchrieg sin mit dr Bahn Uuswyychslazarett uf em Schauinsland versorgt wore.
Anne 1987 isch dr Bedriib no 56 Johr un ca. 12 Mio. Fahrgescht e Zytlang yygstellt wore. Mer het aagfange mit eme greßere Umböu, wu di ganz Styyrtächnik nej gmacht woren isch un au d Großruumkabine abgschafft wore sin. D Schauinslandbahn het 37 neji, aber chleineri Kabine iberchuu (Kapazität: maximal elf Persone oder 825 kg), wu nimmi begleitet wäre vun eme Schaffner. Dr Umböu isch am 6. Däzember 1988 abgschlosse wore. Dr gsamt Fahrbedriib isch deilautomatisiert wore. Doderdur un dur di hecher Aazahl vu Kabine chenne meh Lyt beferderet wäre. D Fahrte chenne jetz no Bedarf aabotte wäre, doderdur sin au d Wartezyte seli verchirzt wore. Am Konstruktionsprinzip isch nyt gänderet wore, d Bahn isch z Dytschland allno di lengscht Seilbahn noch em Umlaufprinzip.
Wel d Fahrgaschtzahle allmeh zruckgehn (2007: 221 000, 2009: 206 400), isch d Schauinslandbahn fir Fryybeger VAG scho lenger e Verluschtgschäft.[1]
Sit em 1. Jänner 2009 fahrt d Schauinslandbahn, wie au alli andere VAG-Bahne usschließlich mit 100 % Ökostrom vo badenova.[2]
Ab em November 2012 isch d Seilbahn für rund drei Millione Euro generalüberholt worde. Die beide alte Seil sin ustuscht und die beide neuere um jewils nün Meter verschobe worde, damit anderi Stelle belastet wärde. Zuesätzlich hät me d Elektrik, de Antriib und d Brämse erneueret. Am 30. April 2013 isch d Seilbahn wider in Betriib gange.[3][4]
D Schauinslandbahn isch vo de Dänkmolstiftig Bade-Würtebärg zum „Denkmal des Monats September 2013“ ernannt worde.
 |
 |
 |
 |
Weblink ändere
Commons: Schauinslandbahn – Sammlig vo Multimediadateie
|
De Artikel gits au as Audiodatei. |
Fuessnoote ändere
- ↑ Alexandra Sillgitt: Schauinslandbahn wird 80 – und bleibt ein Minusgeschäft, Badischi Zytig, 13. Juli 2010
- ↑ Nachhaltig mobil uf de Website vo de Bahn, abgruefe am 26. Augste 2014
- ↑ Schauinslandbahn fährt wieder (Memento vom 17. Juni 2015 im Internet Archive) Freiburg.de, 26. April 2013, abgruefe am 26. Augste 2014
- ↑ Die Schauinslandbahn ist wieder startklar Badische Zeitung online, 2. Mai 2014, abgruefe am 26. Augste 2014