D Schlacht vo Pelagonie

D Schlacht von Pelagonie het im Septämber 1259 zwüschen em Kaiserriich Nikaia (au Nicäa gnennt) und em Fürstedum Achaia stattgfunde.

Schlacht vo Pelagonie
Deil vo: Byzantinisch-Fränkischi Chrieg
Datum Septämber 1259
Ort Pelagonie
Usgang Siig vom Kaiserriich Nikaia
Konfliktparteie
Fürstedum Achaia Kaiserriich Nikaia
Befählshaber
Wilhelm II. vo Villehardouin Johannes Palaeologos
Theodor Dukas
Truppesterki
umbekannt umbekannt
Verlust
umbekannt umbekannt

Hindergrund ändere

Dr Regänt vo Nikaia, dr Michael VIII., het s Byzantinische Riich wider welle häärstelle und s ganze Gebiet zruggeroobere, wo s vor em Vierte Chrüzzuug beherrscht het. 1259 het dr Wilhelm II. vo Villehardouin, dr Fürst vo Achaia, d Anna (oder Agnes) Komnene Dukaina, e Dochder vom Michael II. Angelos, em Despot vo Epirus, ghürootet und eso si Epirus und Achaia gege Nikaia verbündet gsi. Zu dere Allianz het au dr Manfred vo Sizilie, en andere Schwiigersoin vom Michael ghöört, und het sä mit 400 Ridder understützt.

D Schlacht ändere

1259 si d Nikaier z Thessalie iigfalle, im Septämber isch d Armee vo Achaia und Epirus gege Norde marschiert, zum sä abzfange. D Nikaier si vom Sebastokrator Theodor Dukas aagfüert worde. Noch dr französische Chronik vo Morea häig si Armee näbe de Byzantiner us türkische Söldner, 2.000 Kumane, 300 Dütsche, 13.000 Ungare, 4.000 Serbe und Bulgare und e baar Walache bestande – aber es schiint, ass alli Zaale, au die vo öbbe 27 Kawalleriidivisione überdriibe si. Dr Theodor het au die lokale Buure zämmenzooge und si uf de Hügel ufgstellt, so dass sie vo wiitem wie e Däil vo sinere Armee usgsee häi.

Dr Theodor het e falsche Desertöör zum Wilhelm und Michael gschickt, wo au d Sterki vo de byzantinische Druppe überdriibe het. Dr Herzog vo Kärnte, wo au 300 Dütschi aagfüert het, het dene Aagoobe nit glaubt und het d Achäer drzue brocht, z bliibe, wo si sich scho zur Flucht entschiide häi. Dr Michael und sini Druppe si denn in dr Nacht zum Gegner übergloffe. Noch em Georg Pachymeres häi si das gmacht, wil sich im Michael si unehelige Soon Johannes und dr Wilhelm verstritte häi.

Am neggste Daag häi die Dütsche under em Herzog vo Kärnte die dütsche Söldner uf dr andere Site aagriffe. Dr Herzog isch gfalle, und die ungarische Boogeschütze häi d Ross vo de Achäier döödet und d Ridder eso weerlos gmacht. D achäische Fuesssoldate si gflüchdet, d Ridder häi sich ergee, dr Fürst Wilhelm isch au gflüchdet und het sich under eme Höihufe in dr Nööchi versteckt, won er bald entdeckt worde isch. Dr Theodor het en zum Johannes Paläologos brocht, em Brueder vom Michael VIII., wo dr Fäldheer gsi isch. Dä het dr Wilhelm gfange ghalte, bis er strategisch wichdigi Festige in Achaia (drunder Mistra) de Byzantiner usgliiferet het.

D Folge ändere

Dr Johannes Paläologos het denn Thebe erooberet und het us em Fürstedum Achaia, wo bis denn dr sterkst fränkisch Staat in Griecheland gsi isch, e Wasall vo Nikaia gmacht; s Herzogtum Athen het bald si Stell iignoo.

D Chronik vo Morea behauptet, ass dr Herzog vo Kärnte an dr Schlacht mitgmacht häig und gfalle sig. Zu dere Zit isch aber dr Ulrich III. Herzog gsi, und dä het no zää Joor noch 1259 regiert. Es isch mööglig, ass dr Chronist e Herzog as Widersacher vom Wilhelm erfunde het.

Litratuur ändere

  • Warren Treadgold: A History of the Byzantine State and Society. First. Auflage. Stanford Univ Pr, 1997, ISBN 0-8047-2630-2, S. 819.
  • George Ostrogorsky: History of the Byzantine State. 2. Auflage. Rutgers University Press, 1969, S. 447–448.
  • M. Popović, J. Preiser-Kapeller: Die Schlacht bei Pelagonia 1259. Der letzte Sieg der Byzantiner und neue Überlegungen zu seiner Lokalisierung. In: Karfunkel - Combat. Nr. 5, 2009, ISSN 0944-2677, S. 4–7 (einzig aktuelle Darstellung in deutscher Sprache mit Diskussion des neuesten Forschungsstandes).