Joggeli
| |
| Blick in Inneruum vom Stadion zur Haupttribüne übere | |
| Date | |
|---|---|
| Ort |  Basel, Schwiiz
|
| Architekt | Herzog & de Meuron |
| Eigetümer | Gnosseschaft Stadion St. Jakob-Park |
| Verein | FC Basel |
| Eröffnig | 15. März 2001 |
| Erschts Spil | FC Basel - Lausanne Sport (0:0) |
| Kapazität | 38.500 Plätz Euro 2008: 42.500 Plätz |
| Spilflechi | 105 × 68 m |
| Oberflechi | Naturrase |
| Köschte | 250 Millione Franke |
| Veraastaltige | |
| Dialäkt: Baseldütsch |
S' Joggeli (offiziell St.Jakobspark) isch 's Schtadion vom FC Basel und het 38'500 Zueschauerblätz. Es isch eins vo de modärnschte Schtadie in dr Schwiz und au s gröschte.
Baut worde isch s Schtadion vo de Architekte Herzog und de Meuron. Dr St. Jakob-Park wird vill mol au als chline Brueder vo dr Allianz-Arena z Münche bezeichnet.
Für d Europameischterschaft 2008 si d Sitzblätz nöcher zämmegruggt worde, sodass 42'500 Zueschauer Blatz gha hai.
S Schtadion isch in fümf Hauptsektore (A, B, C, D und G) iideilt. In de Sektore gitts Fiinydeilige vo 1-7. S Schtadion het 2 Schdöck usser uf em Bahndamm (Sektor C1 bis C7), dört gits no e dritte Schdock (G), wo für d EM äxtra abaut worde isch. Dr Sektor D, wo Richtig Muttez lit, isch au als „Muttenzerkurve“ bekannt. Dört findet mä bi de Heimschpiil vom FCB die aktivschte Underschtützer vom Club.
Gschicht ändere
S alte Joggeli ändere
Schutt-Wältmäisterschaft 1954 ändere
S alte Joggeli isch für d Schutt-Wältmäisterschaft 1954 baut worde und isch 24. April 1954 eröffnet worde. Im Stadion het s offiziell für 54'828 Zueschauer Blatz ghaa und es isch s zwäitgrösste Stadion noch em Wankdorf z Bärn gsi. Vier Vorrundespiil, äi Viertelfinalspiil und dr Halbfinal zwüsche Ööstriich und Dütschland si do gspiilt worde.
Im Joggeli het s zwäimol 60'000 Zueschauer gee, was e Schwizer Stadionrekord gsi isch. Am Schluss het s im Stadion nume no 36'000 Blätz ghaa, wo die mäiste drvo Standblätz gsi si.
Dr FC Basel und s Joggeli ändere
Wo 1967 dr Landhof nüm grooss gnueg gsi isch für en FC Basel, isch s Joggeli si Häimstadion worde. Dr FCB het si letschts Spiil uf em Landhof im Herbst 1967 gege d Young Fellows Züri 1:0 gwunne. Wo s alte Joggeli abbroche worden isch, het er sini Häimspiil im Schützemattstadion gspiilt.
S nöije Joggeli ändere
S nöije Stadion isch vo Herzog & de Meuron vo 1999 bis 2001 baut worde. Am 15. Merz 2001 isch s mit eme Spiil zwüschen em FCB und Lausanne Sport iigweit worde. Es het denn 31'539 Sitzblätz gaa und wenn s in dr Muttezerkurve Stand- statt Sitzblätz gha het, isch mä uf 33'433 Blätz choo. Für d Fuessball-Öiropamäisterschaft 2008 isch s Stadion in de Joor 2006 und 2007 usbaut worde. Mä het e dritte Rang (d Galerii, Sektor G) über em Sektor C baut. Eso isch mä schliesslig uf e Kapazidäät vo 38'512 Sitzblätz choo.
U-21-Fuessball-Öiropamäisterschaft 2002 ändere
Im Joor 2002 isch s Joggeli dr Hauptspiilort vo dr U-21 Öiropamäisterschaft gsi, wo Tschechie gwunne het. Fümf Spiil häi im Joggeli stattgfunde.
D Krawäll vom 13. Mai 2006 ändere
Am 13. Mai 2006 häi dr FC Basel und dr FC Zürich im Joggeli s entschäidende Mäisterschaftsspiil wo d Zürcher in dr Äxtrazit gwunne häi und eso Mäister worde si. D Aahänger vo de bäide Veräin häi druf im Stadion und au dusse mitenand afo schleegle. D Bolizei het Gummischroot und Dräänegaas iigsetzt und het doch meereri Stunde brucht, bis si d Situazioon het chönne kontrolliere.
D Fuessball-Öiropamäisterschaft 2008 ändere
Bi dr EM 2008, wo Ööstriich und d Schwiz gmäinsam organisiert häi, isch s Joogeli dr Hauptspiilort in dr Schwiz gsi. S Eröffnigsspiil und zwäi witeri Grubbespiil, wo d Schwiz in ene gspiilt het, zwäi Viertelfinääl und äi Halbfinaal si do gspiilt worde.
Bildli ändere
-
D Galerii (Sektor G) z Nacht, in de Farbe vom FC Basel belüüchdet -
Innenaasicht vom FCB-Museum -
Fanshop mit Museum näben em St.Jakob Park
Weblingg ändere
Commons: St. Jakob-Park – Sammlig vo Multimediadateie
|
Dä Artikel basiert uff ere fräie Übersetzig vum Artikel „St._Jakob-Park“ vu de dütsche Wikipedia. E Liste vu de Autore un Versione isch do z finde. |