Amaler
D Amaler (lat. Amali) sind e germanisches Gschlecht gsii, wo d Könige vo de Ostgote gstellt het. Die bikanntiste us dere Famili sind de Ermanarich und de Theoderich de Gross gsii.
De gotischi Gschichtschriiber Jordanes git de Stammbomm vo de Amaler aa. Er nennt d Amaler Halbgötter und gitt as Stammvatter de Gapt aa, wo vo de Forschig as Verschriibig för de Gott Gaut aaglueget werd. Erst i de vierte Generation chunnt de Amal, wo denn a dere Famili de Name gee het. De erst historischi König isch dem sii Grossbueb Ostrogotha gsii, wo im 3. Jh. glebt het. Wie bi allne alte Stammbömm töred aber em Jordanes sini Aagoobe nöd allzu historisch gnoo werde, da gelt bsundrigs för de älteri Tail vorem Ermanarich, wo ane 375 gstorben isch.
Heldesaag ändere
D Amaler sind i de germanische Heldesaag as Amelunge (mhd. Amelunge, an. Ömlungar) bikannt. I de tütsche Heldesaag werd s Königriich um Rabene (Ravenna) und Berne (Verona) Amelunge lant gnennt und de Dietrich vo Bern werd vogt von Amelungen gnennt. Amelunc isch au de Name vo Helde, under andere haisst de Vatter vom Ermenrich und de Grossvatter vom Dietrich vo Bern Amelunc von Rœmisch lant.