Dr Arthur Könnemann (* 12. März 1861 z Bada-Bada, † 10. Februar 1931[1] ischt a deitscher Kombonischt ond Kabellmoischter gwäa.

A baar Staziona aus seim Leaba ändere

Dr Arthur Könnemann ischt am 12. März 1861 z Bada-Bada uff d Welt komma. Nôch-em Abidur hôt’r glei drmit ôôgfanga, Musik zo studiira. Dô drbei ischt sei wichdigschder Lehrer dr Alfred Krasselt gwäa. De meischt Zeit vo seim Leaba hôt’r sei Geld als Kabellmoischder an vorschiidene Stadttheater vrdäant, zerscht en Brandaburg. Seine weitre Staziona send gwäa: Paderborn, Greifswald, Osnabrick, Wesel ond Minschder. Em Jôhr 1887 schliaßlich ischt-em d Leidong vo dr Musikbildongs-Ôschdalt ond vom Orkeschtr-Vorei Mährisch-Oschtrau ibrtraga wôrra. Em Könnemann sei Werk bestôht hauptsächlich aus Stick firs Musiktheater, zom Beischbiil Opra ond Schauschbiilmusik. Er hôt abr au a baar Orkeschtr-Werk ond Stickla fir Klaviir hendrlau.

Am 10. Februar 1931 hôt dr Könnemann d Auga fir emmer gschlossa, rond oin Monat, bevôr’r sein 70. Geburtsdag hett feira kenna. Mr muaß abr feschtstella, dass sowohl dr Könnemann selbr wia au seine Werk heitzodag weitgehend vorgessa send. En akduelle musikalische Nôchschlagewerk suecht mr sein Nama vorgeablich.

A baar vo seine Werk firs Musiktheater ändere

  • Gawrillo
  • Der Bravo
  • Vineta, a romandischs Musikschauschbiil
  • Der tolle Eberstein, Opr en drei Uffziig
  • Madonna mit dem Mantel
  • Die versunkene Stadt, a musikalisch-dramadischs Märle den drei Uffziig

Quell ändere

  • Illustriertes Musiklexikon, rausgäa vom Hermann Abert, Verlag J. Engelhorns Nachf., Stuttgart, 1927

Oinzlne Nôchweis ändere

  1. Archivierte Kopie. Archiviert vom Original am 5. März 2016; abgruefen am 19. August 2014.