Creux du Van
Der Creux du Van isch e Bärglandschaft im Jura a der Gränze zwüsche de Kantöön Nöieburg und Waadt. Dä Ort, wo wie ne riisegi Arena i de Bärge uusgseet, lyt im Gmeindbann vo La Grande Béroche im Nöieburgische. Uf de Felshöchine zringsetum sind Alpweide vo de Nöieburger Ortschafte Saint-Aubin-Sauges, Montalchez und Val-de-Travers und d Alp Le Soliat vo de Waadtländer Gmeind Provence.
Die halbrundi Felswand isch öpe 1200 Meter lang und 500 Meter höch. Di höchsti Stell obedra isch uf 1450 Meter über Meer. Das Bärgtaal isch fascht wie bin ere Chlus dur d Erosioon vom Jurachalch i dem Rügge vom Chettejura entstande.[1] I de Yschzyte het en lokale Gletscher uf dem Bärgzug dä Chrache im Bärg usgrumet und d Form vo der Felsarena vergrösseret.[2] Dr nördlech Felsgrat, wo vom Creux du Van bis zu dr Sännerei Ferme Robert abe louft, heisst «Eselsrügge» (französisch: Dos d’ Ane). Uf em Bode im Taal unden a de Felswand isch Bärgwald gwachse. I de Felse läbe Gämschi und Schteiböck.
Oben a dere spektakuläre Felsformazion, wo i der Turismuswärbig vo der Schwiiz vil zeigt wird, goot e Wanderwäg verby.[3][4]
S Gländ vom Creux du Van isch im Nazionale Inväntaar vo de Landschafte und Naturdänkmööler ufgschribe und stoot sid 1972 under Naturschutz.
Weblink ändere
Commons: Creux-du-Van – Sammlig vo MultimediadateieFuessnoote ändere
- ↑ Creux du Van – das Stade-de-Suisse im Jura (Memento vom 21. Augschte 2017 im Internet Archive) uf erdwissen.ch
- ↑ Géologie de la région du Creux du Van et des Gorges de l’ Areuse (Site cha nüme abgrüeft wärde; Suche im Webarchiv) d Geologii vom Creux du Van uf clubjurassien.ch (französisch)
- ↑ Creux du Van – Naturspektakel (Memento vom 9. Juni 2017 im Internet Archive) uf myswitzerland.com
- ↑ Sentier du Creux du Van (Memento vom 10. Augschte 2017 im Internet Archive) uf wanderland.ch
Koordinate: 46° 56′ 10″ N, 6° 43′ 15″ O; CH1903: 545332 / 198573