D Da Polenta Familie isch en adligi, norditaliänischi Familie gsi, wo vom 13. bis zum 15. Johrhundert e bedütendi lokali und regionali Rolle as Politiker z Ravenna gspiilt het. Es isch aber Dank em Dante und vile andere Künstler, ass si meh as e Fuessnote im ene Gschichtswärk verdient, wil er d Gschicht vo dr Francesca da Polenta in siiner Göttlige Komödie verewigt het.

Überblick ändere

D Familie het ihre Name vo ihrer Stammburg Polenta in dr Romagna südwestlig vo Cesena. Si het sich z Ravenna niiderglo. Die Stadt isch draditionell ghibellinisch, d. h. kaiserdreu gsi. 1239 si aber d Guelfe an d Macht cho. Wo dr Kaiser Friedrich II. im Johr druf d Stadt eroberet het, isch s de Guelfe schlächt gange. Eine drvo isch dr Lamberto da Polenta gsi. Me het en gfangegnoh und denn hiigrichdet.

Si Sohn, dr Guido dr Elter oder Guido Minore, het 1275 e Bündnis mit dr Malatesta Familie z Rimini gschlosse und em Sohn vo dr Familie si Dochder Francesca da Polenta zur Frau ge. Denn het er d Guelfe z Ravenna wider an d Macht brocht und sich an siine politische Gegner grächt. Siini Söhn Lamberto und Bernardino hai em ghulfe, sich dr Macht vom Papst z widersetze. Dr Lamberto isch si Nochfolger as podesta vo Ravenna gsi, dr Bernardino z Cervia.

Im Guido Minore si Änkel, dr Guido Novello, het für e Ziit in dr Stadt gherrscht und dr Dante bi sich ufgnoh. Noch em Dod vom Dante isch er noch Bologna gange as capitano del popolo und sidder het dr Ostasio da Polenta vo Cervia im Guido si Brueder Rinaldo ermordet und sich sälber zum Herrscher über Ravenna gmacht.

Au dr Ostasio isch das gsi, was me hüt e Renaissance Herrscher wurd nenne. Au är het d Künst understützt—er isch in de Johr 1345/46 mit em Boccaccio befründet gsi—isch aber in dr Politik skrupellos und gwaltdätig gsi. 1326 het er Cervia im Süde vo Ravenna iignoh und si Unggle wo dört gherrscht het, dr Bannino da Polenta, und si Cousin umbrocht.

Au si Sohn Bernardino isch in dere brüedermordende Dradition bliibe. Wo siini Brüeder 1347 konspiriert hai gegen en, het er se iigsperrt und lo verhungere. Spöter isch im Bernardino si Sohn, dr Guido, vo siine eigene Söhn abgsetzt worde und die hai en lo verhungere. Eine vo dene, dr Obizzo, het denn siini Brüeder umbrocht. Währed däm siiner Herrschaft het d Stadt Venedig ihre Machtberiich vergrösseret und dr Obizzo het mit ere e Bündnis abgschlosse. 1410 isch e Venezier podestà (Stadtoberhaupt) vo Ravenna worde. 1441 hai d Venezier dr Ostasio Da Polenta, dr Sohn vom Obizzo, noch Kreta ins Exil gschiggt. Dört isch er e baar Johr druf gstorbe, mögligerwiis isch er ermordet worde.

Liste vo de Polentani Herrscher vo Ravenna ändere

D Johreszahle beziehn sich uf ihri Regierigsziit z Ravenna

  • Guido I da Polenta 1275-1297
  • Lamberto I da Polenta 1297-1316
  • Guido II da Polenta 1316-1322
  • Ostasio I da Polenta 1322-1346
  • Bernardino I da Polenta 1346-1359
  • Pandolfo da Polenta 1346-1347
  • Lamberto II da Polenta 1346-1347
  • Guido III da Polenta 1359-1389
  • Azzo da Polenta 1389-1394
  • Ostasio II da Polenta 1389-1396
  • Bernardino II da Polenta 1389-1400
  • Pietro da Polenta 1389-1404
  • Aldobrandino da Polenta 1389-1406
  • Obizzo da Polenta 1389-1431
  • Ostasio III da Polenta 1431-1441

Liste vo de Polentani Herrscher vo Cervia ändere

  • Guido I da Polenta 1282–1297
  • Bernardino da Polenta 1279-1313
  • Bannino da Polenta 1313- 1326
  • Ostasio I da Polenta 1326-1346

Quelle ändere

  • Dr Ardikel "Polenta Family." in dr Encyclopædia Britannica. Ultimate Reference Suite. Chicago: Encyclopædia Britannica, 2009.

Fuessnote ändere