David ibn Abi Simra
Dr David ben Salomon ibn (Abi) Simra (hebräisch דוד בן שלמה אבן אבי זמרא, * öbbe 1479 z Spanie, gstorbe 1573 oder 1589 z Safed), bekannt as Radbas (רדב"ז), isch e früeje Acharon im 15. und 16. Joorhundert gsi. Er isch Ooberrabbiner vo Egüpte und Läiter von ere Jeschiwa gsi und het mee as 3'000 Response (das si religiöös-gsetzligi Entschäidige) verfasst und meereri Büecher.[1]
Biografii ändere
Dr Radbas isch öbbe 1479 z Spanie uf d Wält choo. Won er drizääni gsi isch, het si Familie wägen em Alhambra-Edikt Spanie müesse verloo. Dr David het sich z Safed im Globte Land niidergloo und bim Joseph Saragossi studiert.[2]
Wiso er Eretz Israel verloo het, won er 31 oder 32 gsi isch und uf Fes in Marokko gangen isch, wäiss mä nid. Dört isch er Mitgliid vom rabbinische Gricht worde, wo dr Bresidänt von em dr Nagid Isaak Scholal gsi isch.[3]
1517 het die osmanischi Regierig dr Boste vom Nagid im ganze Riich abgschafft und dr Radbas isch uf Kairo. Dört isch er zum Chachambaschi (Oberrabbiner) vo Egüpte ernennt worde, und het das Amt vierzig Joor lang gfüllt. Er isch für sis Wüsse, si Charakter und si Filantropii bewunderet worde. Dr Radbaz isch en erfolgriiche Händler gsi und het Beziejige in e hufe Länder gha. D Jeschiwa, won er gründet und understützt het, het e hufe bedütendi Gleerti aazooge, under iine dr Bezalel Aschkenasi und dr Isaak Luria.
Dr Radbas isch 1573, anderi sääge 1589, z Safed gstorbe.[4]
Wärk ändere
- Divrei David ("Wort vom David") – uusegee vom Joseph Zamiro, Livorno, 1828.
- Yekar Tiferet , e Däil isch uusechoo z Smyrna 1757, und dr Räst in dr Wilna Usgoob vo Mischneh Torah, 1890.
- Kelalei ha-Gemara ("Reegle vo dr Gemara") – uusechoo in Me-Harere Nemarim vom Abraham ben Solomon Akra, Venedig, 1599.
- Oor Kadmon – uusegee vom Moses Hagiz, Venedig, 1713.
- Magen David ("S Shild vom David") – uusegee vom Chagis, Amsterdam, 1713.
- Metzudat David ("D Festig vom David") – Zolkiev, 1862.
- Michtam le-David ("Im David si Gedicht") – Manuskript.
- Keter Malchut ("D Chroone vom Köönigsdum") – Jom Kippur Gebät, uusechoo zämme mit Oor Kadmon, 1713
- Gilui le-Idrot – e Kommentar über d Idrot, Manuskript in dr Abarbanel Bibliothek z Jerusalem.
- Dinei Rabba ve-Zutra ("Groossi und chliini Enzschäidige") – e Kommentar über e Schulchan Aruch.
- Shivim Panim la-Torah ("Die Sibzig Gsichter vo dr Torah") – Response, Livorno, 1651 (Nos. 1-300); Venice, 1799 (Nos. 1-318); Fürth, 1781 (Nos. 400-649); Livorno, 1818 (Nos. 2051-2341). Vollständigi Usgoob
Fuessnoote ändere
- ↑ "Rabbi David Ibn Zimra"
- ↑ Dr Frumkin in Eben Shemuel, p. 48, dänkt, im Geegesatz zu alle Biograafe, ass das nid woor sig.
- ↑ Rabbi David ibn Zimra, uf chabad.org
- ↑ Chabad.org