Dietmar Eisfeld

e dytsche Dialäktautor un Liederkumpenischt

Dr Dietmar Eisfeld (* 5. Oktober 1929 z Gatersleben; † 4. Augschte 2016) isch e dytsche Dialäktautor un Liederkumpenischt gsii.

LääbeBearbeite

Är isch z Gatersleben im hitige Sachse-Anhalt uf d Wält chuu un dert im Harz mit siibe Gschwischter ufgwachse. No dr Schuel het er zerscht uf eme Landguet gschaft un derno in ere Gießerei. Är het aafange Gedicht schrybe, au regimekritischi, des het em in dr domolige DDR Brobläm brocht. Iber Oscht-Berlin isch er anne 1953 in Weschte gflichtet. Wel e Brueder vun em z Chränzech gschafft het, isch er an Hochrhy chuu un het si schließli z Wäär nidergloo. Är het aafangs uf em Böu gschafft, e Zytlang bi dr Firma Hummel z Wäär un derno 15 Johr lang as Chemywärcher in dr Schwyz

Im Lauf vu dr Johr het er s Alemannisch us dr Region glehrt un schließli sälber aagfange uf Alemannisch z schrybe. E Dail vu syne Gedicht het er au as Lieder vertont, mer chännt in dr Region z. B. sy „Saudätschlied“ un s hochdytsch Lied „Im Wehratal bin ich geboren“. Bim Singe het er als Akkordeon oder Keyboard derzue gspiilt, derzue het er au anderi Inschtrumänt chenne wie Gyyge, Mundharmonika, Klavier oder Boschthorn. Är isch Dirigänt vu verschidene Gsangverain gsii, unter anderem au vu dr Wääremer „Vierteleschlotzer“, wun er 25 Joor lang Mitgliid gsii isch.

Zue sym 80. Geburtsdag het dr Ferderkrais Stadtmuseum Wäär mit Unterstitzig vu dr Stadt Wäär s Liederbuech „Im Wehratal bin ich geboren“ uusegee, wu s unter anderem 55 vu syne Lieder din het, aber au Lieder vu andere Wääremer.

Dr Eisfeld isch ghyrote gsii un het mit syre Frau Roswitha zwee Sihn ghaa.

WäärchBearbeite

  • Im Wehratal bin ich geboren. Lieder von Dietmar Eisfeld. Illustriert von Hermfried Richter. Förderkreis Stadtmuseum, Wehr 2010. ISBN-13 978-3-00-0330457-6

WeblinkBearbeite