Dominique Hasler

D Dominique Hasler (* 6. Oktober 1978 z Grabs as Dominique Matt) isch e liechteschtainischi Bolitikeri (VU). Si isch syt em 30. Meerz 2017 as Regieriigsreeti mit Zueständigkait fir s Minischterium fir Inners, Bildig un Umwält Mitgliid vu dr Regierig vum Fiirschteduum Liechteschtai.

d Dominique Hasler (2022)

Uusbildig un Beruef

D Dominique Hasler isch isch im Spital z Grabs uf d Wält chuu un z Muura mit zwee jingere Brieder, Jonas (* 1989) un Valentin (* 1995), im «Kirchapörtle» ufgwachse. Iri Mueter Monika Gantenbein geb. Matt (* 1958) isch Chindergäärtneri, ire Vater Peter Gantenbein (* 1956) Primaarleerer. Dr Vater stammt vu Gams SG, di drei Chinder sin anne 1996 yybuurgeret woore. Wu iri Eltere ghyroote hän, het au si dr Name Gantenbein iberchuu. Dr Bolitiker Egon Matt isch e Brueder zue ihre Mueter. Si isch uf d Kantonsschuel z Sargaas im Schwyzer Kanton St. Galle gange, wu si d Matura un s Leererseminar absolviert het. Fir d Hilfsorganisazioon «One World» isch si fir ai Joor lang uf Afrika un het si fir Strooßechinder z Burkina Faso yygstetzt. Anne 2000 isch si Sonderschuelleereri an dr Hailpedagoogische Daagesschuel Seidenbaum z Trüebbach woore. Parallel zue iirem Beruef as Leereri het si aafange Special Needs Education an dr Interkantonale Hochschuel fir Hailpedagoogik z Züri studiere, un anne 2006 mit em akadeemische Graad Master of Arts abgschlosse. Ab 2006 het si as Sonderschuelleereri an dr Sonderpedagoogische Daagesschuel am Hailpedagoogische Zäntrum z Schaa gschafft. Vu 2007 bis 2009 het si ne Uusbildig in Organisazionsentwicklig un Coaching am Inschtitut fir aagwändti Sozialwisseschafte z Bad Ragaz absolviert. Anne 2008 sich d Dominique Hasler Mitgliid vum Direktorium woore un het d Beraichslaitig vu dr Sonderpedagoogische Daagesschuel am Hailpedagoogische Zäntrum z Schaa ibernuu. In dr Joor 2008 bis 2009 het si dernääbe au Beraich Management Consulting gschafft un as Dozänti an dr Hochschuel Liechteschtai.

Im Joor 2010 isch si zue dr Liechteschtainische Alters- un Chrankehilf gwächslet, wu si Mitgliid vu dr Gschäftslaitig gsii isch un s Huus St. Martin z Esche glaitet het. Bis zue iire Waal in d Regierig anne 2017 isch si bi dr Liechteschtainische Alters- un Chrankehilf Gschäftslaitigsmitgliid gsii un au Laiteri vu dr Organisationsentwicklig un Kommunikation.

Vu 2010 bis 2015 isch d Dominique Hasler nääbenamtli au Briefigsexpeerti an dr Interkantonale Hochschuel fir Hailpedagoogik z Züri un vu 2015 bis 2017 Vorstandsmitgliid vu dr Concordia Landesvertretung Liechtenstein.

Bolitik

D Dominique Hasler isch zyter anne 2016 Mitgliid vum Barteipresidium vu dr Vaterländische Union, aire vu dr boode grooße Volksbarteie vum Fiirschteduum Liechteschtai. No dr Landdaagswaal 2017 isch si vu iire Bartei as Regierigsreeti fir d Koalitionsregierig mit dr Fortschrittliche Bürgerpartei nominiert un am 30. Meerz 2017 aaglobt woore. Si laitet as Regierigsreeti s Minischterium fir Inners, Bildig un Umwält.

Privatlääbe

D Dominique Hasler isch syt em 12. Oktober 2018 mit em Daniel Hasler (* 1974), eme Fueßballtrainer, ghyroote. Si woont mit iirem Mann un syne zwai Chinder us ere friejere Beziehig, Chiara un Alessio, z Muura.

Literatur

• Herbert Öhri: Dominique Gantenbein, die nächste Politikerin aus den Matt-Familien Liechtensteins. In: lie:zeit. Zeitschrift für Liechtenstein und die Region. 53/2017: S. 54-56

Weblink

 Commons: Dominique Hasler – Sammlig vo Multimediadateie

• Regierungsrätin Dominique Hasler, Offiziälle Lääbeslauf uf em Webportal vu dr Regierig vum Fiirschteduum Liechteschtai.
• Redaktion: Hasler, Dominique. In: Historischs Lexikon vom Förschtatum Liachtastaa.
• Gespräch mit Regierungsratskandidatin Dominique Gantenbein, VU Online, 13. August 2016
• Im Fokus: Regierungsrätin Dominique Gantenbein. Macherin mit Herz und Verstand. Gemeindeblatt Mauren, Dezember 2017 (Online: S. 50, 51, 52)
• Interview mit Regierungsrätin Dominique Hasler (ehem. Gantenbein), youtube.com, 03.10.2018

Fueßnote

Dä Artikel basiert uff ere fräie Übersetzig vu dere Version vum Artikel „Dominique_Hasler“ vu de dütsche Wikipedia. E Liste vu de Autore un Versione isch do z finde.