Elisabeth Haich
D Elisabeth Haich (* 20. März 1897 z Budapest, † 31. Juli 1994 z Ponte Tresa, uf Ungarisch: Haich Erzsébet [ˈhɒʔitʃ ˈɛrʒeːbɛt]) isch e ungarischi Künstleri gsii. Si het zäme mit em Selvarajan Yesudian di erscht Yoga-Schuel i de Schwiz gründet.
Lebe ändere
Ungarn ändere
D Elisabeth Haich isch em 20. Märze 1897 z Budapest uf d Welt cho und isch scho as Chind e gueti Klavierspileri gsii. Si het Musig und Bildhauerai studiert und denn z Budapest en Atelier uftue. Si het sich starch för Spiritualität und Esoterik interessiert und hett sich guet i hinduistische Schrifte uusgchennt. Ends vo de 30er Joor het si de Inder Selvarajan Yesudian keneglernt und denn ane 1939 mit em zäme e Yogaschuel i erem Atelier z Budapest uuftue.
Schwiz ändere
Nochdem 1948 s kommunistische Regime d Yogaschuel zuetue het, isch es a de Eliabeth Haich und em Selvarajan Yesudian im November1948 glunge, Budapest z verloo und si sind uf Zöri cho, mitem Ziil uf Kalifornie z goo. Baid sind denn aber i de Schwiz blibe und hend zwösched 1949 und 1955 i merere schwiizer Städt Yoga-Schuelene ggründet und z Ligurie isch z Diano Marina e Yoga-Summerschuel uftue wore und spöter e zwaiti z Ponte Tresa im Tessin.
D Elisabeth Haich isch verhürootet gsii und het e Soo ghaa. Si isch am 31. Juli 1994 z Ponte Tresa gstorbe.
Werch ändere
D Elisabeth Haich isch en international anerchennti Bildhaueri gsii und gelt zäme mitem Yesudian as aini vo de Bigründer vom Yoga z Europa und baid hend maasgeblich a de Verbraitig und Popularisierig vom Yoga i de Schwiz biitrait. D Elisbeth Haich het au meriri Büecher usegee, wo sich mit Esoterik, Spiritualität und Yoga bifasset. Büecher vo ere werdet bis hüt immer wider noi usegee und sind au i anderi Sprooche öbersetzt wore.
Büecher ändere
- Elisabeth Haich: Beavatás; Budapest (uf Ungarisch)
- Elisabeth Haich: Einweihung: Mystisch-biographischer Roman; Zürich, 1954
- Elisabeth Haich: Sexuelle Kraft und Yoga; Stuttgart 1966
- Elisabeth Haich: Tarot; Stuttgart 1969
- Selvarajan Yesudian & Elisabeth Haich: Sport und Yoga; Thielle 1949
- Selvarajan Yesudian & Elisabeth Haich: Yoga in den zwei Welten; Thielle 1951
- Selvarajan Yesudian & Elisabeth Haich: Yoga im heutigen Lebenskampf; Thielle 1954
- Selvarajan Yesudian & Elisabeth Haich: Der Tag mit Yoga; Stuttgart 1959
- Selvarajan Yesudian & Elisabeth Haich: Yoga und Schicksal; Thielle 1963
- Selvarajan Yesudian & Elisabeth Haich: Raja-Yoga; Thielle 1966
- Selvarajan Yesudian & Elisabeth Haich: Hatha-Yoga; München, Engelberg 1971