Emil Schill (Landrat)

Dr Emil Schill (* 12. Februar 1928 z Fryburg; † 21. Augschte 2002 isch e dytsche Kommunalbolitiker gsii. Vu 1968 bis 1973 isch er Landroot vum Krais Fryburg gsii un derno bis 1993 Landroot vum neie Landkrais Brysgau-Hoochschwaarzwald.

Lääbe ändere

Dr Schill isch z Fryburg uf d Wält chuu un dert au ufgwagse. No dr Oberrealschuel het er an dr Uniwersitet Fryburg Räächts- un Staatswisseschafte studiert. Anne 1952 het er di Eerscht un 1956 di Zwoot Staatsbriefig gmacht. Derno het er zum Dr. jur. promowiert. Unter anderem bim Landrotsamt isch er Assessor gsii. Anne 1959 isch er zue dr Stadt Fryburg gwägslet un isch dert Stadträächtsdiräkter gsii. Im Johr 1968 isch dr Schill zum Landroot vum Krais Fryburg gwelt woore, des Amt het er speter mol dr. „Traumjob vun eme Jurischt“ gnännt. Anne 1973 isch er zum Landroot vum neie Landkrais Brysgau-Hoochschwaarzwald gwehlt wore un isch no au zwai Mool in däm Amt bstetigt woore. In däne 25 Johr, wun er Landroot gsii isch, het er si yygsetzt fir d Integrazion vu dr friejere Krais Fryburg, Hochschwarzwald un Mille un e Uusglych zische dr Lääbesbedingige uf em Land un in dr Stadt. Im Beraich vu dr Gsundhait isch e medizinischi Grundversoorgig in dr ganze Flechi umgsetzt woore un mit dr Stadt Fryburg het mer e gmainsami Millabfuhr un dr Regio-Verchehrsverbund zwääg broocht. Dr Schill het au grooße Wäärt glait uf d Zämenaarbet mit dr Noochbere im Elsiss. As Eerschte het er uf dr Stuel vu dr Eerschte Landesbeamti e Frau ghoolt, d Gudrun Heute-Bluhm, wu speeter Oberbuurgermaischteri vu Löörech wooren isch. Bi umstrittene Theeme het er kai bolitischi Ussenandersetzig gscheit, in dr Diskussion um d B 31-Oscht het er si geege massivi Protescht fir e Schwaarzwald-Transitautobahn yygsetzt. Anne 1989 isch dr Schill aistimmig zum Bresidänt vum Landkraisdaag Baade-Wiirtebäärg gwehlt woore, dervoor isch er deert scho Voorsitzer vum Räächtsuusschuss gsii. Anne 1993 isch er pänsioniert woore.

Näbe syre kommunalbolitische Aarbet het er si au fir s regional Bruuchdum un di regional Kultur engaschiert, zum Byschpel isch er Bresidänt vum Bund „Heimat und Volksleben e. V.“ gsii.

Literatur ändere