Öiropabrugg
T Öiropabrugg isch e langi Brugg im Weschte vo de Stadt Züri.
Si hät d Bouform vom e Viadukt und gaat vo Höngg im Chräis zää über d Limet und d Autobaan «A 1» und s Gleisfäld vo de Ysebaan und dänn au na über t Hoolstraass bis uf Altstetten im Stadtchreis nüün übere. Drum isch si mee als ein Kilometer lang. Es isch es Bouwèèrch us Spannbeton und es hät 38 Fälder mid underschidlech langer Spannwyti zwüschet de Pfyler. D Brugg ghört zu de früene Objäkt, wo me mit de Vorspanntechnik gmacht hät.[1] Si hät i bäide Richdige je zwäi Faarspuure für d Motorfaarzüüg und es Trottuaar.
D Brugg isch vo 1961 bis 1962 bout worde. Im Underschiid zu dem, wo d Vercheersplaaner dozmool empfole händ, isch die Brugg nid en Deil von ere komplete Zäntrumsumfaarig vo Züri woorde.[2] Nu na die nördlech Helfti vo de Brugg ghört hütt im Straassenetz vo Züri zu de Hauptvercheerstraasse und die südlech zu de undergordnete stedtische Verbindigsstraasse.[3][4]
Uf Der Nordsyte faat t Öiropabrugg unden am Rèbbèèrg bim Fridhoof vo de refermierte Chile vo Höngg a. Das isch bi de Chrüüzig, wo d Winzerstraass und d Straass Am Wasser ufenand stossed. Under em Bruggechopf isch bim Hönggerhoof, wo en bewegti Gschicht hät,[5] der Uferwèèg, wo oberhalb vo de Brugg Chlooschter-Faar-Wèèg gheisst und undedra eifach Am Giesse. Grad änet de Limet isch d Rampe vo de Mäierwisestraass uf d Brugg. Dänn gaat si am Grundwasserwèèrch Hardhoof und bi de Sportplätz im Hardhoof verby und hät wisawi vo de Bändlistraass t Autobaanuuffaart für d Bèèrner und Basler-Spuur. Grad öppe under de Brugg faat – vom Zäntrum vo Züri us gsee – t Autobaan a, und d Bèèrnerstraass mündet i se yne. Die Uusfaart gheisst Hönggerrampe.
Uf de Süüdsyte vo de Autobaan chunt vo Oschte d Rampe vo de Würzgrabestraass und vo Weschte die vo de Max-Högger-Straass. Die Strass hät de Name ane 1967 übercho; de Max Högger, wo vo 1881 bis 1996 gläpt hät, isch im Zwäite Wältchrieg Komendant vo Züri gsi.[6] Wyter gège Süüde gaat d Brugg über d Aargauerstraass, und dänn am Änd vo de Stumpegleis vom alte Rangschierbaanhof Altstette, em hüttige SBB-Dienschtwèèrch Züri-Herdere,[7] verby und über d Gleis vo de Fèèrnlinie zwüschet em Hauptbaanhof und em Baanhoof Züri-Altstette. Da hät’s vom Baanhof uus e nöji Rampe uf d Brugg, wo nume für d Büs und d Welo isch.
Nach de Hoolstraass chunt me vo de Öiropabrugg uf ere lange Rampe abe und d Brugg lauft i de Middi vo de Luggwèègstraass uus. Das isch churz vor der Baslerstraass z Altstette.
Über d Brugg faare Püss vo de VBZ-Linie 80, 89, 304 und 308. Uff der Brugg isch d Haltstell Tüffewiis.[8]
Weblink ändere
Commons: Europabrücke (Zürich) – Sammlig vo MultimediadateieFuessnoote ändere
- ↑ Rudolf Vogt, Reto Kugler, Walter Rutishauser, Jürg Ingold: Europabrücke: Bauwerkzustand und Erhaltungsmassnahmen. In: Schweizer Ingnieuer und Architekt, 1997, S. 360–365.
- ↑ H. Stüssi: Das Hochleistungsstrassennetz im Kanton Zürich. In: Schweizerische Bauzeitung, 1971, S. 632–635.
- ↑ Stadt Züri: Tempo- und Verkehrsregimes mit ÖV-Trassierung. Pschluss vom Stadtraat vom 1. Dezämber 2013.
- ↑ Kanton Zürich: Strassen – Hochleistungsstrassen. Strategie und Elemente. 2001.
- ↑ Pia Meier: Endlich: «Höngger Hof» wird eröffnet. In: Zürich Nord. Quartierzeitung für Zürich-Affoltern, Seebach, Wipkingen, Höngg, Unterstrass, Oerlikon und Schwamendingen, 11. August 2016.
- ↑ Max-Högger-Strasse uf alt-zueri.ch
- ↑ Ruedi Baumann: Die längste Werkstaette der Schweiz, 17. Mai 2014, uf tagesanzeiger.ch
- ↑ Linienetz vo de VBZ