Uschnitt us dr Stadtaasicht vom Matthäus Merian im 17. Joorhundert[1] Wisawii vom Münster chunnt dr Münsterbärg in Münsterblatz iine. Dr Regishäimerhoof und dr Falkestäinerhoof stöön grad am Blatz uf dr lingge site vom Münsterbärg.
Im Spootmiddelalter häi Gäistligi im Falkestäinerhoof gläbt. Wo 1529 Baasel reformiert worde isch, si die katholische Doomhere us iire Hüüser am Münsterblatz uszooge und uf Freiburg im Brisgau züüglet. 1610 isch d Liigeschaft nöi baut worde und dr Bürgermäister Wettstäi het lang dört gwoont.
1799 isch dr Hoof noch Blään vom Samuel Werenfels umbaut worde mit dr hütige Fassade uf e Blatz zue.
1821 isch s naturwüsseschaftlige Museum vo dr Uniwersidäät Baase im Falkestäinerhoof ufdoo worde, zämme mit eme füsikalisch-chemische Labor, eme Hörsaal und ere
Bibliothek. Dr Peter Merian (1795-1883) isch eerenamtlig Kassier und Verwalter vom Museum gsi. Er het d Sammlig usbaut, und vilmol mit sim äigene Gäld zaalt[2]
1849 isch s Museum in s nöje Geböid vom Berri an dr Augustinergass züüglet. Dr Falkestäinerhoof isch no e chli vo dr Uni brucht worde, denn isch d Gwärbschuel driichoo, wo spööter die Ooberi Realschuel ghäisse het. Am Aafang vom 19. Joorhundert isch die in iire Nöibau an dr De-Wettestrooss zooge, und mä het der Falkestäinerhoof umbaut zum Ämter driizdue.[3] Vo 1903 bis 1906 het dr Hochbauinspäkter Theodor Hünerwadel dragschafft. Dr gross Liechthof mit dr dreistöckige Galerii isch denn entstande.[4]
Vor allem brächtig isch dr Iigangsberiich worde und d Representazionsrüüm im erste Stogg.[5]
