Dr Gametofüt (griech. gamete, gametes „Ehefrau, Ehemaaa“ und phyton „Pflanze“) isch bi Pflanze die sexuelli Generazioon, wo Gamete-bildet, also die haploidi Faase vom Generazioonewäggsel. Die diploidi Faase wird as Sporofüt bezäichnet. Dä broduziert bi niidere Pflanze (Moos und Farn) d Spoore, wo sich d Pflanze mit ene ungschlächtlig vermeert.

Fümf Stadium in dr Entwicklig vom Gametofüt (Prothallium) vom ene Farn. Us em Atlas der Botanik vom Arnold Dodel-Port

E Gametofüt het immer meereri Zälle. Er waggst us ere Meiospore vom ene Sporofüt uuse und isch dorum immer haploid, jeedi vo sine Zälle het also nume en äinzige Chromosoomesatz. Dr Gametofüt entwigglet Sexualorgaan, wo Antheridie und Archegonie häisse und in deene d Gameete. Wenn zwäi vo deene Gschlächtszälle verschmelze, wird us ene e diploidi Zygote, wo am Aafang vo dr zwäite Generazioon (dr diploide Sporofütegenerazioon stoot. Andersch gsäit: Noch Verschmelze vo de Kärn wäggst d Zygote zum ene Sporofüt; dä broduziert Spoore, und vo deene chunt wider e Gametofüt und so isch dr Kräeislauf vo de bäide Generazioone gschlosse.

D Gametofüte vo de Moos si die grüene Moospflänzli.

Bi d Faarn hingege si d Gametofüte (Prothallium) so stark reduziert, dass mä si kuum no cha gsee und mä si liicht mit eme Lääbermoos cha verwäggsle. Bi de Farnpflanze isch dr grüen Däil vo dr Pflanze, wo mä oobe gseet, dr Sporofüt. Uf dr Zäichnig vom Otto Wilhelm Thomé (linggs) gseet mä rächts unde e Gametofüt (Prothallium), wo drus dr nöi Sporofüt waggst. An de Bletter vom Sporofüt sitze Sporangie, us deenen wärde d Spoore abgee.

No mee reduziert si d Gametofüte vo de Soomepflanze. Bi deene befindet sich dr männlig Gametofüt im Pollechorn und bestoot bi de Bedecktsaame (Blüetepflanze) nume us drei Zälle. Dr wiiblig Gametofüt isch dr Embryosack in dr Soomenaalaag; dä bestoot, wenn er voll entwicklet isch, mäistens us siibe Zälle.

Liddratuur ändere

  • Lehrbuch der Pflanzenwissenschaften, 37. Aufl., Springer, Berlin/Heidelberg 2014, S. 572.
  Dä Artikel basiert uff ere fräie Übersetzig vum Artikel „Gametophyt“ vu de dütsche Wikipedia. E Liste vu de Autore un Versione isch do z finde.