Alemannische Wikipedia

Georg Kleis

dytsche Dialäktautoor gsii

Dr Georg Kleis (* 14. Mai 1920 z Missenne; † 1. Mai 2020 z Nonnenweier) isch e dytsche Dialäktautoor gsii.

Lääbe ändere

Dr Kleis isch z Missenne as Suun vum Jakob Kleis uf d Wält chuu un mit eme Brueder un ere Schweschter uf eme Buurehoof uffgwagse.

Anne 1943 het er d Maria Magdalena Krumm vu Malterdinge ghyroote. Mit ire het er fimf Chinder ghaa, drei Deechtere un zwee Siin.

Im Zweete Wältchrieg isch er Soldaat z Russland un z Frankryych gsii, am Änd vum Chrieg isch er in amerikaanischi Gfangeschaft groote. No im Joor 1945 isch er retuurchuu in d Haimet.

Är het buurt un in dr 1960er Joor elf Joor lang im Stadtpark Loor gschafft, derno het er no siibe Joor er bi dr Gmai Missenne gschafft un isch dert unter anderem Sporthallemaischter gsii. Wie scho sy Vater un sy Grooßvater isch er z Missenne Obstbaumwaart gsii un het unter anderem e chlaini Baumschuel grindet. Är het si au fescht engaschiert, wu Missenne anne 1979 bi dr Aktion „Unser Dorf soll schöner werden“ mitgmacht het un uf Landeseebni dr eerscht Blatz gmacht un e Goldmedallie gwunne het. Uf em Bundeswettbewäärb bi dr „Grüne Woche“ z Berlin het Missenne derno e Silbermedallie gwunne. Dr Kleis isch Mitgliid bim Obst- und Gartenbauverein Meißenheim e.V. (OGV) gsii, langi Joor aus as Voorsitzer, sy Noofolger in däm Amt isch dr Adolf Klotz woore.

Dr Kleis het Gediicht un Gschiichte im alemannische Dialäkt vu Missenne gschriibe. En Uuswaal drus het er in zwai Biechli publiziert, „Undrem Schnoogehimml“ (1984) un „Im Schnitzgradde“ (1988). Anne 2012 het er unter em Titel „Äschbele“ e Doppel-CD uusegee. Dodruf het s 38 vu syne Dialäktgschiichte, vu iim sälber voorglääse. Derzue sin Sache vun eme in dr Anthology „Meissenheim. Bilder und Texte aus vergangenen Tagen“ uusechuu.

Syni Lääbeserinnerige het er anne 1996 im Buech „So war*s“ uusegee.

Di letschte Joor het dr Georg Kleis im Diakonissehuus z Nunnewiihr gläbt, wu au scho sy Frau ire Lääbesoobe verbroocht het. Am 1. Mai 2020 het er d Auge fir immer zuegmacht, zwoo Wuche vor sym 100. Gebuurtsdaag.

Wäärch ändere

  • Undrem Schnoogehimml. Heiteres und Besinnliches aus dem Ried in niederalemannischer Mundart. Verlag Technische Dokumentation, Lahr 1984. 143 S. Ill., 2., erw. Aufl. 1985
  • Meissenheim. Bilder und Texte aus vergangenen Tagen. Texte von Philipp Brucker und Georg Kleis. Gestaltung P. P. Daferner und Horst Ganter. Geiger, Horb a. N.1985. 84 S. Ill.
  • Im Schnitzgradde. Erzählungen und Gedichte in Meissenheimer Mundart. Verlag Techn. Dokumentation, Lahr 1988. 143 S. ISBN 978-3-9801383-1-4 kart.
  • So war's. Schauenburg, Lahr 1996. 124 S. ISBN 978-3-7946-0460-9 kart.
  • Äschbele. Doppel-CD. Lahr 2012

Weblink ändere

Vun "https://als.wikipedia.org/w/index.php?title=Georg_Kleis&oldid=994036"