Gerd Müller (CSU)

Dr Gerd Müller (* 25. Augschte 1955 z Krombach as Gerhard Müller) isch e dytsche Bolitiker (CSU). Vu 2013 bis 2021 isch er Bundesminischter fir wirtschaftligi Zämmenarbet un Entwicklig gsii.

Gerd Müller (2009)

Läben un Beruef

No dr Realschuel het dr Müller zerscht e chaufmännischi Uusbidlig gmacht. Uf em zweete Bidligswäg het er sy Abtitur noogmacht un het noch em Grundwehrdienscht mit eme Stipändium vu dr Konrad-Adenauer-Stiftig e Studium vu dr Pedagogik, Psychology un Bolitik absolviert, wun er as Diplom-Wirtschaftspedagog abgschlosse het.

Anne 1980 isch dr Müller Gschäftsfierer vun eme Verband wore, isch aber speter in s bayrisch Wirtschaftsminischterium yydrätte, wun er zletscht as Oberregierigsrit im Grundsatzreferat un as stelldrättende Prässesprächer vum Bayrische Wirtschaftsminischter Anton Jaumann bis 1989 gschafft het. Anne 1988 het dr Müller an dr Universitet Regensburg promoviert mit ere Dissertation iber Die Junge Union Bayern und ihr Beitrag zur politischen Jugend- und Erwachsenenbildung.

Syter anne 2009 isch dr Gerd Müller an dr Hochschuel fir Tächnik un Wirtschaft Dresden Honorarprofässer fir Internationali Agrarbolitik.

Dr Gerd Müller isch remisch-katholisch, ghyrote un het zwai Chinder.

Bolitik

Bartei

Dr Gerd Müller isch vu 1978 bis 1988 Zweete Burgermaischter un Chraisrot gsii. Är het si derzue in dr Junge Union engaschiert, wun er vu 1982 bis 1991 Bezirksvorsitzer z Schwoobe un vu 1987 bis 1991 JU-Landesvorsitzer z Bayern gsii isch. Syter anne 1993 isch er stellverdrättende Vorsitzer vum CSU-Bezirksverband Schwoobe.

Abgordnete

Vu 1989 bis 1994 het dr Müller em Europäische Barlemänt aaghert un isch in däre Zyt Barlemäntarische Gschäftsfierer vu dr EVP-Fraktion gsii.

Syt 1994 isch dr Müller Mitglid vum Dytsche Bundesdag fir dr Wahlchrais Kempte, Lindou un Oberallgai. Bis 2005 isch er u. a. ussen- un europabolitische Sprächer un stellverdrättende Vorsitzer vu dr CSU-Landesgruppe im Dytsche Bundesdag gsii. Derzue isch er vu 2002 bis 2005 stellverdrättende Vorsitzer vum Uusschuss fir Främdeverchehr un Turismus gsii.

Dr Gerd Müller isch alliwyl as diräkt gwehlte Abgordnete vum Wahlchrais Oberallgai in dr Bundesdag yyzoge. Bi dr Bundesdagswahl 2005 isch er uf 61,5 % vu dr Erschrstimme chuu. Bi dr Bundesdagswahl 2009 uf 53 % un bi dr Bundesdagswahl 2013 uf 60,7 %.

Dr Müller isch Mitglid vu dr Europa-Union Parlamentariergruppe Deutscher Bundestag.

Effetligi Ämter

Am 22. Novämber 2005 isch dr Müller as Barlemäntarische Staatssekretär bim Bundesminischterium fir Ernehrig, Landwirtschaft un Verbruucherschutz in di vu dr Bundeschanzleri Angela Merkel gfiert Bundesregierig beruefe wore.

Am 17. Dezämber 2013 het dr Bundesbresidänt Joachim Gauck dr Gerd Müller zum Bundesminischter fir wirtschaftligi Zämmenarbet un Entwicklig ernännt.

Sunschtigs Entgaschmänt

Vu 2008 bis 2012 isch dr Gerd Müller Bresidänt vum Dytsche Hailbederverband e. V. gsii

Uuszaichnige

• 2007: Bayrische Verdienschtorde

Weblink

 Commons: Gerd Müller (CSU) – Sammlig vo Multimediadateie

• Websyte vum Gerd Müller
• Biographie beim Deutschen Bundestag
• Lebenslauf bei der CDU/CSU-Bundestagsfraktion
• Yytrag über Gerd Müller (CSU) in dr Abgordnete-Datebank vum Europäische Parlament
• Läbeslauf bim Bundesminischterium fir Ernehrig, Landwirtschaft un Verbruucherschutz
• tagesspiegel.de 25. August 2013: „Aufnahme Griechenlands war ein Fehler“
• Gerd Müller uf abgeordnetenwatch.de

Fueßnote

Dä Artikel basiert uff ere fräie Übersetzig vu dere Version vum Artikel „Gerd_Müller_(CSU)“ vu de dütsche Wikipedia. E Liste vu de Autore un Versione isch do z finde.