Grete Heger

en öschtriicheschi Schauspillere

D Grete Heger (* 8. Juni 1916 z Wien; † 25. Dezämber 2007 z Züri) isch e eeschtryychischi Schauspiileri, wu 60 Joor lang am Zürcher Schauspiilhuus ufdrätten isch.

Iren eerschte Ufdritt het d Heger mit vier Joor im Buurgertheater Wien in dr Operette Ihr Korporal ghaa.

Am Konservatorium z Wien het si Schauspiilunterricht ghaa bim Josef Danegger un bim Hugo Stern. Ase jung het si au im Kabarett Literatur am Naschmarkt un im Kabarett Der liebe Augustin bei Stella Kadmon gspiilt.

Ändi 1935 isch si dur dr Ferdinand Rieser an s Schauspiilhuus Züri engaschiert woore. Deert het si d Hermia in Ein Sommernachtstraum vum William Shakespeare gspiilt, d Titelroll in dr Uruffierig vu Arthur Aronymus und seine Väter vu dr Else Lasker-Schüler (Reschy: Leopold Lindtberg), d Titelroll in Hanneles Himmelfahrt vum Gerhard Hauptmann, d Hedwig in Die Wildente vum Henrik Ibsen, d Titelrolle in Undine vum Giraudoux, d Yoshiko in Der Soldat Tanaka vum Georg Kaiser, d Titelrolle in Der Lügner und die Nonne un in Ingeborg vum Curt Goetz, d Cleopatra in Cäsar und Cleopatra vum Shaw, d Smeraldina in Der Diener zweier Herren vum Goldoni, d Franziska in Minna von Barnhelm vum Lessing, in verschiidene Stuck vum Nestroy un in dr Aiakter Die Verlobung unter der Laterne, Insel Tulipatan un Der Regimentszauber vum Offenbach. Im Schauspiilhuus isch si doodmool ufdrätte mit Lyt wie Therese Giehse, Albert Bassermann, Ernst Ginsberg, Kurt Horwitz un Leopold Lindtberg.

Anne 1946 isch d Heger retuur gange uf Wien un het in dr Saison 1946/47 am Volkstheater Wien d Dienschtmagd Irma in Der gläserne Pantoffel vum Ferenc Molnár (Reschy: Gustav Manker) gspiilt un 1947/48 uf ere Tournee d Regine in Gespenster vum Ibsen (Reschy: Albert Bassermann). Vu 1948 bis 1950 het si am Neue Theater in dr Scala Wien un au an dr Wiener Kammerspiil gspiilt, unter anderem d Titelroll in Die Fee vum Molnár, derzue het si gaschtwyys au z Züri gspiilt.

Ab 1950 isch si wiider am Zürcher Schauspiilhuus gsii un het deert d Salome Pockerl in Der Talisman vum Johann Nestroy, s Dummerchen in Maikäfer-Komödie vum Josef Viktor Widmanns, d Walburga in Haus der Temperamente vum Nestroy un d Sara Leibowitz in Der Tag, an dem der Papst gekidnappt wurde vum João Bethencourt gspiilt.

Verschiideni Tournee hän d Heger dur Dytschland un d Schwyz gfiert un derzue het si iber d Joor Gaschtspiil z Wien un z Minche ghaa, am Corso-Theater Züri (1968 d Mutter Strobl in Die kleine Niederdorfoper vum Paul Burkhard) un am Bernhard-Theater Züri (unter anderem 1966 in Auf Befehl der Kaiserin vum Hermann Ferdinand Schell, 1987 in My Fründ Hanspi vu Chase/Peter Arens) un au am Theater Fauteuil Basel.

Iri letschte Ufdritt im Zürcher Schauspiilhuus het d Grete Heger in dr 1990er-Joor ghaa, unter anderem in Dantons Tod vum Georg Büchner.

Filmografy

ändere
  • 1969: Kurzer Prozeß (Fäärnseefilm)
  • 1972: Galgentoni (Fäärnseefilm)
  • 1977: Der Tag, an dem der Papst gekidnappt wurde (Fäärnseefilm)
  • 1981: Das Flugjahr
  • 1987: Tatort – Pension Tosca oder Die Sterne lügen nicht

Literatur

ändere
ändere