Kernè Hans

De Kernè Hans (* 22. Juni 1945 z Stüèlingè als Hans Kern; † 16. Mai 2013 z Stüèlingè) isch èn stylprägendè Fasnächtler, Mundartdichter und Naturkundler z Stüèlingè gsi. Grufè worrè isch er fascht nu Schärmuuser.

Dè Schärmuuser i sinerè Funktion als Nadurschutzwart mit èm Bündel Bärlauch i dè Händ.

Ufgwachse isch de Kernè Hans as ainzige Sohn vu de Bäckersfamilie Kern, wo im domolige Gaschthus Kranz i dè Stüèlingèr Understadt ihr Gschäft gha hèn. Johre lang isch er für d Stüèlingèr Stadtvowaltong Waibel gsi und hèd ihri Poscht vodailt.

Fasnet

Dè Schärmuuser isch zvorderscht i dè Röllimusig z Stüèlingè als Präsident (Oberrölli), Fahnè- un Schällebaumträger z Gang gsi.

Dè Schèrmuuser i sineri Paraderollè als Pfarrer bi dè Beerdigung vo dè Fasnet bim Kehruusball im Rebschtock z Stüèlingè.

Er hät diè Guggèmusig-artigi Formation anno 1962 mit is Lebè grufè un isch Zyt sines Lebèns dè Dätschmeischter i sellem Huufè gsi. Nebbeby isch er Hästräger vo de Stüèlingor Narrèzunft gsi und hät als Pumuckl vokleidet sin närrischè Johresrückblick vordrait. Sini Paraderollè isch dè Hochwürdè gsi, dè närrische Pfarrer, wo diè Trauerzeremonie vo dè hochheiligè Fasnet vollzogè un noch dè Vobrennig vom Bög dè närrische Seggè gä hèt. Bi dè Trauerzeremony isch er vo drei närrischè Minischtrantè unterschtützt worrè. D'Minischrantè hän dodèby warmes Wasser, kaaltes Wasser un „Weihrauch“ (Rauch von èmè Stumpè) vodeilt. S'Brivileg vo sinè Hochwürdè isch d'Schnörrè voll Messwy gsi, um d'Stimmbänder z'ölè. Legendèr sin sini Lièder un Sprüch gsi. Als Lièd hät er sini Amanda vordrait, d'Zeremony vo dè närrischè Bergpredigt hät èbèso dezuè ghört. E Hampflè Lièdtext im Stüèlingèr Dialèkt wared au deby.

Mundart

S Alemannischè z braktizyrè isch eins vo sinè gröschtè Aaligè gsi. Er hèt vili fascht uusgschtorni Ussdrügg regelmässig bruucht, un dodèmit am Lèbè erhaaltè. S beharrlichè Bschtoo uff üsem Dialèkt isch sicher ganz im Sinn vo allè Autorè i dè alemanischè Wikipedia gsi. Mitte vo dè 1970er Johr hèt er èn Band mit Heimètgedicht usègää. S eint odder anderè Schmankerl dört druus hèt er a dè Fasnet zum Beschtè gää.

Naturkundi

Dè Schärmuuser isch èn echtè Ègsberte i Sachè heimischi Flora un Geology gsi. Sell Wüssè hèt er ehrèamtlich bim Schwarzwaldvorein Stüèlingè ybrocht. Uf Aafroog hèt er au für Bekannti sognannti geologisch-bodanischi Wanderigè durrègfüèrt. Èm Nadurschutz hèt er mit sinèrè Begaabig aktiv diènt, indem er i dè Wälder rund um Stüèlingè als Nadurschutz-Beufftragtè vom BUND tätig gsi isch.

Floristisch aagluègèt isch iim vo allèm am Schuzt vo dè heimischè Orchideè glägè gsi. Bsunders dè üsserscht seltènè Gäälè Frauèschuè, wellè i sim Revir im Gwann Lindenbärg/Spièssèbärg heimisch isch, hèt sin bsunderè Schutz gnossè. Eher vo bodanischer/kulinarischer Nadur war si Indrèssi am Bärlauch. Als Egsbertè hèt er einem dè Unterschyd zwischèm Bärlauch un Maièrysle brääzis erklärè chönnè.

Weblingg

• Trauerrede von Arnfried Winterhalter Narrenzunft „Hungrige Stühlinger“ e. V., abgruefe am 17. Dezämber 2013