D Hedwig Rapp geb. Humpert (* 2. Novämber 1922 z Offeburg; † Mitti Oktober 2009 ebd.) isch e dytschi Mundartautori gsii.

Läbe ändere

D Hedwig Humpert isch z Offeburg ufgwagse, ihre Elterehuus isch in dr Zähringerstroß. Ihre Brueder Ludwig isch dert speter dr Vorsitzende vu dr Bürgergemeinschaft Süd wore.

D Humpert hätt aigetli gärn welle studiere un e Lehreri gee, aber ihri Eltere hän welle, dass ihre Brueder studiert, fir si as Maidli hän si des nit netig gfunde. Si het derno no dr Schuel e Lehr as Buechhalteri gmacht un derno bi dr Firma Doll in dr Okenstroß gschafft.

Im Johr 1948 het si dr Hermann Rapp vu Durbach ghyrote. Ihre Mann het no dr Hochzyt au ne Stell bi dr Firma Doll iberchuu.

Anne 2003 isch ihre Mann im Alter vu 77 Johr gstorbe, si sin 55 Johr ghyrote gsii. Fir sii isch des e schwäre Schicksalsschlag gsii, wu si fascht nit verchraftet het. Eso het si ai Johr speter, anne 2004, in s Pflägehaim mieße, wel si Pflääg bruucht het. Dert, im Altershaim Paul-Gerhardt-Haus im Brünnlesweg z Offeburg, isch si schließlig Mitti Oktober 2009 im Alter vu 86 Johr gstorbe.

Gedicht ändere

Scho as Schuelermaidli het d Humpert aafange Gedicht schrybe. Speter het si au chlaini Verzellige gschribe. Si het zue dr Sproch vu ihre alemannische Dialäktgedicht un –verzellige gmaint »Schriebe und schwätze, wie de Schnabbel gwachse isch«. Im Novämber 1992 het si ihre erscht Gedichtbändli Es herbsteld uusegee, insgsamt het si acht Gedichtbänd vereffetligt. Im Lauf vu dr Johr het si ihri Gedicht un Verzellige au effetli vordrait, bi Geburtsdäg, bi Verain, vor allem bi dr Offeburger Regionalgruppe vu dr Muettersproch-Gsellschaft, bi Seniorenomittäg, bim Chilchechor. Au im Radio het si Ufdritt ghaa un e Dail Gedicht sin au in Zytige druckt wore.

Di Badisch Zytig het zue ihrem Dod gschribe:

„Hedwig Rapp schrieb – feinsinnig und liebevoll – häufig über die kleinen Dinge des Alltags.“

Schrifte ändere

  • Es herbsteld: Novämber 1992
  • Ludder Viechereie: Pfingschte 1993
  • D‘Kinderzit: Septämber 1993
  • Ebbis firs Narreblättli: Jänner 1994
  • Fir e stilles Stündli: Augschte 1994
  • Des war's: Oktober 1994
  • OH JEMINE: Merz 1995
  • Heiteres vun Zwei- un Vierbeiner: April 1998

Weblink ändere