Hermann I. vu Bade

Dialäkt: Undermarkgreflerisch

Dr Hermann I. vu Bade (* um 1040; † 25. April 1074 z Cluny) isch vu 1061 bis 1074 Markgrof vu Verona gsi, Grof im Bryysgau un dr Grinder vu dr Linie vu dr Markgrofe vu Bade.

Figur vum Hermann I. in dr Chilche vu St. Peter

Dr Hermann isch dr eltscht Suhn vum Berthold I. vu Zährige gsi. Syy Titel as Markgrof vu Verona goht uf d Zuegherigkeit vu dr March Verona zum domolige zährigische (Titular-)Herzogtum Kärnte zruck, derwylscht d Grofschaftsrächt im Bryysgau Familiebsitz gsi sin. Vu syyre Frau Judith weiß mer nume dr Vornamme, us wellere sidweschtdytsche Adelsfamilie si chuu isch, isch nit bekannt.

Noch dr Chrieg im Investiturstryt, wu d schwebische Stammland vu dr Zährige verwieschtet gha het, het sich dr Hermann I. 1073 in s Chloschter Cluny zruckzoge, het d Ordensglibd abgleit un isch Laiebrueder wore. Är isch dert im Johr derno gstorbe. D Katholike dänke an dr selige Markgrof Hermann I. vu Bade am 25. April.

Us dr glyche Grind het si jingere Brueder, dr Berthold II. vu Zährige ab 1079 dr Schwärpunkt vu syyre Herrschaft an dr Oberryy verlageret.

In dr Zellig vu dr Markgrofe vu Bade het Hermann no kei Ornigszahl, in dr Zyylede vu dr Dreger vum Name Hermann isch er dr erscht. In dr Zyt derno isch dr Name Hermann schyns alliwyl fir dr eltscht Suhn brucht wore, zem Deil het sogar e jingere Suhn dää Name ibernuu, wänn dr elter Brueder as Dreger vum Name gstorben isch.

Us dr Eh mit dr Judith sin die Chinder firigange:

• Hermann (* um 1060; † 7. Oktober 1130); as Hermann I. Markgrof vu Bade. Dr Hermann II. het si as erschte Zähriger Markgrof vu Bade gnännt.
• Luitgard

Literatur

• Hansmartin Schwarzmaier u. a.: Geschichte Badens in Bildern. 1100–1918. Kohlhammer, Stuttgart/Berlin/Köln 1993. ISBN 3-17-012088-3.
• Florian Lamke: Die frühen Markgrafen von Baden, die Hessonen und die Zähringer. Zeitschrift für die Geschichte des Oberrheins 154 (2006) (ISSN 0044-2607) S. 21–42.
• Arthur Kleinschmidt: Hermann I. In: Allgemeine Deutsche Biographie (ADB). Band 12, Duncker & Humblot, Leipzig 1880, S. 120–122.
• Otto Gerhard Oexle: Hermann I.. In: Neue Deutsche Biographie (NDB). Band 8, Duncker & Humblot, Berlin 1969, ISBN 3-428-00189-3, S. 643 f.

Weblink

• genealogie-mittelalter.de
• Markgrofe vu Bade uf Landeskunde online

Vorgänger ---

Markgrof vu Bade bis 1074

Nochfolger Hermann II.

Dä Artikel basiert uff ere fräie Übersetzig vu dere Version vum Artikel „Hermann_I._von_Baden“ vu de dütsche Wikipedia. E Liste vu de Autore un Versione isch do z finde.