Herrschaft Wessebärg

D Herrschaft Wessebärg isch es chlises Territorium im Heilige Römische Riich gsi, wo im hütige Schwiizer Kanton Aargau gläge isch.

Geographii

Zu de Herrschaft Wessebärg hei di beide Dörfer Mandach und Hottl und de dazughörige Gmeindsbann ghört. Zwische dene Dörfer ligt de Wessebärg uf dem d Burg vo de Wessebärger gschtande-n-isch.

Gschicht

D Wessebärger sind scho im Mittelalter Grundbsitzer vo grosse Deil vo Mandach und Hottl gsi. Di nideri und di höchi Grischtsbarkeit - und dodermit d Landesherrschaft - isch bi de Habsburger gläge. Wo di im 1316i Geld bruucht hei, hei si ihri Rächt an d Wessebärger verpfändet. D Wessebärger hei so chönne d Landesherrschaft mit de Gricht übernäh und sind so es selbständigs Territorium im Riich worde. S Ändi vo de Wessebärger Herrschaft isch im 1468 cho, wo d Bärner in de Folg vom Waldshueterchrieg d Herrschaft Wessebärg bsetz und d Landesherrschaft übernoh hei.