Leo VIII.

Dr Leo VIII. (* z Rom; † 1. Merz 965) isch ab em 4. Dezämber 963 Papscht gsii.

Pontifikat

Sy Vorgänger Johannes XII. isch dur e Synod, wu vum remisch-dytsche Chaiser Otto I. yygruefe woren isch, noch ere Aachlag gege ihn wäge zahllose Verbräche abgsetzt wore. D Synod het no dr Leo VIII. am 4. Dezämber 963 zum Papscht gwehlt.

Dr Protonotarius Leo het as wirdige Mann gulte, isch aber zum Zytpunkt vu syre Ernännig zum Papscht Laie gsii. Gege dr Kanon isch er vum Bischof vu Ostia an aim Dag nochenander zum Ostiarius, Lektor, Exorzischt, Akolyth, Subdiakon, Diakon, Prieschter un schließli zum Bischof gweiht. No syre Wahl isch dr Leo VIII. uf Basis vum Privilegium Ottonianum as Papscht indronisiert wore. Drotz ass er vun e Dail zum Gegepapscht erklert woren isch, giltet är as rächtmäßige Noofolger vum Johannes XII.

Dr Johannes XII. sälber het nie uf sy Rächt verzichtet ghaa un het, wu dr Chaiser Rom verloo het, e Synod abghalte. Di nämlige Bischef, wu ihn dodmol abgsetzt ghaa hän, hän jetz s nämlig Urdail gege dr Leo VIII. gfällt. Dr Johannes XII. isch aber am 14. Mai 964 gstorbe.

Ohni si wyter um dr Leo VIII. z schääre, wu im Lager vum Chaiser Otto Zueflucht gsuecht ghaa het, hän d Remer jetz dr Benedikt V. (22. Mai bis 23. Juni 964) zum Papscht gwehlt. Dr Otto, wu in däre Wahl e Bruch vum zerscht au vum Johannes XII. billigte Privilegium gsää het, isch jetz mit ere starke Heeresmacht gege Rom zoge. Dr Benedikt V. isch abgsetzt un an sy Stell wider dr Leo VIII. ins Amt glupft wore, där isch aber isch im Merz 965 gstorbe.

Literatur

Harald Zimmermann: Leo VIII.. In: Biographisch-Bibliographisches Kirchenlexikon (BBKL). Band 4, Herzberg 1992, ISBN 3-88309-038-7, Sp. 1442–1443.
Ytrag in d Catholic Encyclopedia, Robert Appleton Company, New York 1913 (änglisch)

Weblink

Commons: Leo VIII. – Sammlig vo Multimediadateie

Vorgänger	Amt	Nochfolger
Johannes XII.	Papscht 963–964	Benedikt V.
Benedikt V.	Papscht 964–965	Johannes XIII.

Dä Artikel basiert uff ere fräie Übersetzig vu dere Version vum Artikel „Leo_VIII.“ vu de dütsche Wikipedia. E Liste vu de Autore un Versione isch do z finde.