Dr Kombonischt vo deam Werk uff-ma Fodole vom Félix Nadar
Dialäkt: Schwäbisch

Lieschen und Fritzchen (Originaltitl: Lischen et Fritzchen) ischt a franzeesischa Operedde en oim Uffzug vom Kombonischda Jacques Offenbach.[1] S Libreddo stammt em franzeesischa Original vom Paul Boisselot. Zom erschda Mol ibr d Bihne ganga isch des Werk am 12. Juli 1863 z Bad Ems.

HandlongBearbeite

En dr Handlong kommet bloß zwoi Persona vor, nemlich selle Titlfigura Lieschen ond Fritzchen.

S Lieschen ischt a Mädle us-em Elsass. A-ma scheena Dag macht-se sich auf noch Paris, om deet als Beasavorkaifere a bissle Geld fir sich selber ond fir ihrn alda kranka Vadder zo vordäana. Uff-em Markt begegnet-se e-ma flodda Kerle, wo sich Fritzchen nennt ond wia sui us-em Elsass stammt. S dauret et lang, ond dia zwoi jonge Leit vorliabet sich ganz arg en-anander. S Fritzchen dät des Mädle am gernschda glei hoim ens Elsass mitnemma.

Wia sich no s Lieschen ond s Fritzchen gegaseidich vo ihrer Vorgangaheit vorzehlet, stellet-se fescht, dass-se Gschwischder send. S Fritzchen ischt neemlich scho vor etliche Johr – wia’s Lieschen noh a Kend gwäa ischt – noch Paris ganga ond hot do drbei bald sei Schweschderle vorgessa. Au s Lieschen hot koi Erennrong meh an ihrn Bruader.

Weil s Fritzchen jetzt zwar zo-ra Schweschdr komma ischt ond dodurch sei geliibts Mädle vorlora hot, pressirts-em nemme, meglichscht bald ens Elsass zruckzokehra. Wia schliaßlich boide traurich von anander Abschiid nemma wellet, entdeckt s Fritzchen beim Lieschen an Briaf, wo-se noh gar et uffgmacht hot, weil-se et leasa koo. S Fritzchen abr beherrscht dui Fähichkeit. Drom geit-em s Lieschen des Schreiba, ond er liist-ra vor. Der Briaf ischt vom Lieschen seim Vadder, ond der teilt-ra en sellem Schreiba mit, dass sui a unehelicha Dochter vo seira Schweschder ischt. S Fritzchen selber ischt also bloß ihr Vedder. Wia s Lieschen ihr Mueder em Sterba gleaga ischt, hot-em ihr Bruader vorsprocha, sei Nichde zo adopdiira, ond dees hot’r au so gmacht. Do druff fallet sich dia zwoi Liibende frehlich en d Ärm, send glicklich ond machet sich mitnander uff da Weag en ihr geliibts Elsass.

LitradurBearbeite

  • Leo Melitz: Führer durch die Operetten. Globus-Verlag, Berlin 1917, S. 64.
  • Verein für Geschichte/Denkmal- und Landschaftspflege e. V., Bad Ems: Offenbachs „Lischen et Fritzchen“. Einführung in das Werk und Faksimile des deutschen Librettos (= Bad Emser Hefte. Nr. 167, ISSN 1436-459X = Jacques-Offenbach-Reihe der Bad Emser Hefte. Nr. 24). VGDL, Bad Ems 1997.

FuaßnodaBearbeite

  1. Dr Kombonischt selber hot sei Werk als conversation alsacienne bezeichnet.
  Dä Artikel basiert uff ere fräie Übersetzig vu dere Version vum Artikel „Lieschen_und_Fritzchen“ vu de dütsche Wikipedia. E Liste vu de Autore un Versione isch do z finde.