Lucius Tarquinius Priscus

De Lucius Tarquinius Priscus isch de föft König vo Rom (616-578 v. Chr.) gsii und het zu de Famili vo de Tarquinier ghört. Well er e fromme Maa gsii isch, het er de Biiname Priscus ("Fromme") öberchoo.

LebeBearbeite

De Lucius Tarquinius het as junge Lucumo (etr. lauχume "König") ghaiise und isch de Soo vom Griech Demaratus und enere adlige Etruskeri us Tarquinii gsii. Zimmli riich, isch er mit sinere Frau Tanaquil uf Rom choo, isch glii zomene agseene Maa wore und schliessli zom Ezücher vo de beede Söö vom König Ancus Marcius wore. Bim Tod vom Ancus Marcius het er di beede Söö uf d Jagd gschickt. Do si drum bi de Königswaale nöd present gsii sind, hend d Römer de Lucius Tarquinius aistimig zum noie König gweelt.

TaateBearbeite

Er het s Land am Tiber une melioliere loo und so nöd nume wertvolls Ackerland gwune, sondern ono d Süüchegfoor chöne verringere. Zodem het er au de grossi Abwasserkanal, d Cloaca maxima, baue loo. Uf en goot de Circus maximus und de Jupitertempel ufem Kapitol zrugg. Zodem het er au di Sibyllinische Büecher erworbe.

ToodBearbeite

Nochdem de Lucius Tarquinius 38 Joor lang öber Rom gherrscht gha het, isch er vo zwee Hirte ermordet wore, wo vo de beede Söö vom Ancus Marcius aagstachlet wore sind. D Tanaquil aber het de Mord verschwige und de Servius Tullius as Regent iigsetzt. Di etruskischi Tomba François stellt uf Freske Champfhandlige dar, wo mit dem Mord i Verbindig stönd.