Maimonides
Dr Maimonides (1138-1204) isch dr latinisiert Name für dr Rabbi Mosche ben Maimon, hüfig abkürzt Rambam, dr berüehmtischd jüdisch Religionsphilosoph und Theolog, wo im Hoochmiddelalter gläbt het. Si bekanntists Wärk isch dr filosofisch More Nevuchim. Sini 13 Iqqarim[1] si s nöggste zu Dogme worde, wo s Juudedum kennt.
Läbe ändere
Dr Mosche ben Maimon isch am 30. Merz 1138[2] z Cordoba im maurische Schbanie uf d Wält cho. Er het die jüdische Schrifte gschdudiert aber au wältligi Schdudie in Aschdronomi, Medizin, Philosophi und Mathematik gmacht. 1148 het d Familie Schbanie verlo wäge de Judeverfolgige vo de Almohade. Über Marokko und Jerusalem isch d Familie schliesslig noch Ägypte cho und het sich 1165 z Alexandrie niiderglo. Dr Maimonides isch Oberrabbiner vo Kairo und dr persönlig Dokter vom Saladin (1138-1193) worde, wo ä baar Johr schbööter d Chrüzritter gschlage und Paleschtina und Syrie eroberet het.
Er isch am 13. Dezember 1204 z Fustat, hüte Kairo, gschdorbe.
Fuessnoote ändere
- ↑ hebräisch עיקרי האמונה היהודית interpretiert as Glaubenssetz oder Brinzipie
- ↑ Stroumsa, Maimonides in his world: portrait of a Mediterranean thinker, Princeton University Press 2009, Site 8. Noch eltere Kwelle wie z. B. em dtv-Lexikon, Münche 1970, Band 12, Site 30, isch er am 30. Merz 1135 uf d Wält choo.