Martin Gotthard Schneider

Dr Martin Gotthard Schneider (* 26. April 1930 z Konschtanz; † 3. Februar 2017 ebedert) isch e dytsche Chilchemusiker, Chilchemusikdiräkter un Landeskantor.

Lääbe

Dr Schneider het z Haidelberch, z Dibenga un z Basel evangelischi Theology] u nun Chilchemusik studiert. Ab 1958 het er z Fryburg gschafft, zerscht as Vikar an dr Ludwigschilche, vu 1960 bis 1970 as Religionslehrer am Kepler-Gymnasium. In däne Johr het er scho mit ere brait gfächerete Chilchemusik aagfange. Zytwys het er näbeberuefli as Chilchemusiker an dr Christuschilche un dr Pauluskirche gschafft un isch Bezirkskantor im Chilchebezirk Fryburg gsii. Anne 1958 isch er Bryysdreeger bim Internationale Improvisationswettbewärb Haarlem gsii. Im Johr 1961 het er z Fryburg d Heinrich-Schütz-Kantorei grindet, wun er bis 2009 glaitet het. 1970 isch dr Schneider zum Chilchemusikdiräkter wore. Vu 1970 bis 1995 het er di hauptberuefli Kantorestell an dr Ludwigschilche un dr Pauluschilche ibernuu, un vu 1975 bis 1995 s Amt vum Landeskantor fir Sidbade. Vu 1963 bis 1997 het er an dr Musikhochschuel Fryburg glehrt, zerscht s Fach Orgelimprovisation, speter au Liturgik, Hymnology, Gmaisinge, theologischi Information. 1980 isch er zum Brofässer wore.

Dr Martin Gotthard Schneider isch am 3. Februar 2017 im Alter vu 86 Johr z Konschtanz gstorbe.

Wäärch

S kompositorisch Schaffe vum Martin Gotthard Schneider isch an dr chilchemusikalische Praxis orientiert un umfasst Chor- un Orgelmusik. Vor allem as Autor vu neie gaischtlige Lieder isch dr Schneider firidrätte. 1961 het er fir sy Lied Danke für diesen guten Morgen dr 1. Bryys im Liederwettbewärb vu dr Evangelische Akademy Tutzing iberchuu. Mer chännt au sy Lied Ein Schiff, das sich Gemeinde nennt (2. Bryys 1963). 1975 isch sy Liederbuech Sieben Leben möcht ich haben erschine. Orgelimprovisationen un Chormusik mit em Martin Gotthard Schneider sin uf CD uusechuu. Im Evangelische Gsangbuech (EG) het s sechs Lieder vum Schneider.

Uuszaichnig

• 1996: Verdienschtchryz am Band vu dr Bundesrepublik Dytschland

Weblink

• Martin Gotthard Schneider. Chorlaiterporträt uf dr Websyte vu dr Heinrich-Schütz-Kantorei Fryburg, 20. Jänner 2013.
• Sein „Danke“-Lied wurde weltweit bekannt. Kirchenlieder-Komponist Martin Gotthard Schneider wird 80 Jahre alt. epd-Artikel uf dr Websyte vu dr EKD, 19. April 2010.

Dä Artikel basiert uff ere fräie Übersetzig vu dere Version vum Artikel „Martin_Gotthard_Schneider“ vu de dütsche Wikipedia. E Liste vu de Autore un Versione isch do z finde.