Die änglischi Masque isch e höfischs Maskespiil im 16. und 17. Joorhundert gsi und e diräkte Vorfaar vo dr barocke Opere z Ängland.

Dr Ben Johnson

Form ändere

D Masque isch verwurzlet gsi im franzöösische ballet de cour und dr masquerade. Si bildet en äigeständigi Gattig und isch z Ängland sit 1513 ufgfüert worde. In dr Masque si zum erste Mol Dichdig, Muusig, Danz, Gostüm, Büünieffekt und Archidektuur zämmechoo und si isch usschliesslig am Hoof vo Aaghöörige vom Köönig ufgfüert worde. Dr Schweerpunkt isch eender uf de Gsäng und Dänz glääge, wo tüpisch barock unnatürlig und pompös-virtuos gsi si, as uf dr dramaturgische Gschlossehäit; so si Drama und Muusig immer no vonenander drennt gsi und d Vokal- und Instrumentalmuusig het nüt zum Drama biidräit. 1609 het dr Dichder Ben Jonson zur Masque of Queens e sogenannti Antimasque drzue doo as Geegesatz zur hööfische Masque. Das isch e parodistisch-groteski Daarstellig gsi, wo vilmol au obszöön gsi isch und vo Bruefsschauspiiler ufgfüert worde isch.

Dr Ufbau ändere

AM Aafang isch e Broloog cho und denn dr Ufzug vo de maskierte Daarsteller (Masquers). Druf isch en allegorischs Hauptstück cho, wo mänggisch e müthologische Inhalt ghaa het, mit gschwätzte Dialog, Dänz, Chöör (Madrigal), Sololieder, Pantomime und Airs (Lieder für d Lute). Am Schluss het s dr Main Dance gee, won en Art Ball gsi isch, wo die maskierte Daarsteller drbii iiri standesgmäässe Partner gweelt häi, senn isch d Demaskierig choo und schliesslig dr Schlussdanz, wo au s Publikum het chönne mitdanze.

  Dä Artikel basiert uff ere fräie Übersetzig vum Artikel „Masque“ vu de dütsche Wikipedia. E Liste vu de Autore un Versione isch do z finde.