Nootka-Sund
Koordinate: 49° 46′ 13″ N, 126° 27′ 37″ W
Dr Nootka Sound isch e diefe Meerfjord im pazifische Nordweste vo Amerika, wo sich in drei Hauptarm ufzwigt. Dr Sund befindet sich an dr Westküste vom Vancouver Island in dr kanadische Browinz British Columbia. Er isch dr Laag nooch dr middleri vo de fümf Sund, näben em Quatsino Sound, Kyuquot Sound, Clayoquot Sound und em Barkley Sound, wo d Westküste brääge.
D Iifaart zum Nootka Sound het 1774 dr spanisch Seefaarer Juan Pérez entdeggt. Im Merz 1778 isch dr britisch Kapitän James Cook uf sinere dritte Wältumsaeglig as erste Oiropäer in Sound iinegfaare. Er isch am Friendly Cove verbii, wo elf Joor spööter dr Schaublatz vo dr Nootka Sound-Kontrowärse worde isch, und het vor em chliine Bligh Island, wo zmitzt im Sund lit, gankeret. Dört het er die indigene Nuu-chah-nulth (Nootka) kennegleert.
D Nootka häi em zuegrüeft: „itchme nutka, itchme nutka“, was in iirer Sprooch „gang zrings ume“ bedütet. Dr Cook het aber gmäint, das sig dr Naame vom Volk. Dr Sund het aber dä Naame bis hüte bhalte.
Dr britisch Seefaarer John Meares het in Friendly Cove 1788 e temporäre Handelsblatz ufdoo. 1789 häi sich au Spanier dört niidergloo und wo die vier britischi Schiff kaperet höi, isch s zun ere schwere diplomatische Krise zwüsche Groossbritannie und Spanie choo, dr Nootka Sound Kontrowärse, wo erst 1795 ändgültig bigläit worde isch.[1][2] Sithäär het mä dr Nootka Sound eläi gloo. Wie fast die ganzi Westküste vom Vancouver Island, isch er wäge sinere riiche Meerdierwält bekannt und für si umberüerti Natur, wo no in mängge Däil erhalte bliibe isch.
Litratuur ändere
- Heather Harbord: Nootka Sound and the Surrounding Waters of Maquinna. Heritage House Publishing Company Limited, Surrey BC 1996; ISBN 1-895811-03-1.
- Laurie Jones: Nootka Sound Explored. A Westcoast History. Ptarmigan Press, Campbell River BC 1991; ISBN 0-919537-24-3.
- William Ray Manning: The Nootka Sound Controversy. In: Annual Report of the American Historical Association, Part 16, 1904, ISSN 0065-8561, S. 279–484 (Reprint: University Microfilms Inc., Ann Arbor MI 1980).
Fuessnoote ändere
- ↑ The Department of National Defence: Canadian Military Heritage. The Evacuation of Nootka Archivlink (Memento vom 23. Februar 2007 im Internet Archive) (ängl.)
- ↑ City of Nanaimo: Historical Timeline of Nanaimo; 2004 (pdf; engl.)
|
Dä Artikel basiert uff ere fräie Übersetzig vum Artikel „Nootka_Sound“ vu de dütsche Wikipedia. E Liste vu de Autore un Versione isch do z finde. |