Dialäkt: Schwäbisch

O mein Papa isch dr Titl vo-ma Liad vom Schweizer Kombonischda Paul Burkhard, wo en de 1950er Jôhr zo-ma internazionala Welterfolg wôrra ischt. En sellem Liad schildret a jonga Frau ganz liibevoll ihrn Vadder, wo et bloß a wondrbarer Zirkusclown ond Soildenzer, sondern au a scheener Môô gwäa ond drom vo älle Leit bewondret wôrra ischt.

Gschicht ändere

Zwoi Bihnawerk ond a Schallbladd ändere

Em Jôhr 1939 wuud en Zirich em Paul Burkhard sei Operedde Der Schwarze Hecht em schwiizerditscha Dialekt nôch-ma Libreddo vom Jürg Amstein uruffgfihrt. Dr musikalische Heheponkt dô dren ischt a Liad, vortraga emma gebrochena Hochdeitsch mit grammadische Fehler, wo dr Refrain laudet: O mein Papa war eine wunderbare Clown, o mein Papa war eine große Kinstler …. Zonägschd fendet des Liad abr koi bsondra Beachdong. Zäah Jôhr schbätr macht dô drvoo dr Schweizer Rondfonk a Uffnahm mit dr Lys Assia ond brengt’s uff-ra Schallbladd raus. Des isch dr Durchbruch. Des Liad wuud an Riesaerfolg, ond des et bloß en dr Schweiz. S wuud en älle meegliche Sprôcha ibrsetzt ond vo-ma Haufa Sängerinna en ihre Muedrsprôcha gsonga. Dr Paul Burkhard landet an Welthit. Dô druff schlägt dr Erik Charell em Paul Burkhard vor, vom Schwarza Hecht a hochdeitscha Fassong rauszobrenga. Er selbr ibrsetzt’s, odr bessr gsait, bearbeitet des Stick, schreibt a baar Sacha om ond fiagt neie Doil dren-nei. Dr Paul Burkhard komboniirt a baar neie Liadr drzua, ond rauskommt dui Musikalischa Komeede Feuerwerk. Am 16. Mai 1950 ischt d Uruffihrong am Minchner Gärtnerplatz-Theatr. Dr Erfolg ischt so grauß, dass sich an Haufa Theatr richtich om des Stick reißet. En ibr 40 Schbrôcha soll’s ibrsetzt wôrra sei.

Film ändere

Wenn en de 1950er-Jôhr a Sengschbiil uff dr Bihne an graußa Erfolg ghet hôt, hend sich d Filmproduzenda drom grissa, d Rechde zo kriaga, om des Stick au em Kino zeiga zo kenna. So isch’s et vrwonderlich, dass scho viir Jôhr nôch dr Uruffihrong vo sellem musikalischa Luschtschbiil a gleichnamiger Musikfilm entstanda ischt. De weiblich Haubtroll dô dren hôt d Lilli Palmer gschbiilt ond des Liadle gsonga. Dera ihr Interpretazioo hôt au drzua beitraga, O mein Papa noh bekanntr zo macha.

O mein Papa ischt au dr Titl vo-ma Dokumentarfilm ibr da Paul Burkhard, wo dr Felice Zenoni 30 Jôhr nôch-em Kombonischda seim Ableaba (2007) rausbrôcht hôt.[1][2][3]

Weitre Versioona ändere

Dr US-Amerikaner Eddie Fisher hôt 1954 ondrem Titl Oh! My Pa-Pa a englisch-schbrôchiga Fassong rausbrôcht. Dui hôt sich en sellem Jôhr acht Wocha lang als Nr. 1 en de USA halda kenna. D Hollendere Wilma Landkroon hôt uff dr CD 19 Successen a Ausgab uff Niiderlendisch gsonga (Oh mijn Papa). Dr Schweizer Rap-, Reggae- ond Funk-Senger Dodo Jud hôt em Auguscht 2012 en dr Sendong Cover me vom Schweizer Fernseha (SF 1) O mein Papa – zamma mit dr Lys Assia – en-ra ganz nuia Form rausbrôcht.[4]

Oinzlne Nôchweis ändere

  1. Dr Film en dr Internet Movie Database Archivlink (Memento vom 26. Juli 2013 im Internet Archive)
  2. Näheres zom Film bei art-tv.ch (Memento vom 26. Juli 2013 im Internet Archive) Archivlink (Memento vom 26. Juli 2013 im Internet Archive)
  3. A Plakat
  4. http://www.sendungen.sf.tv/cover-me/Sendungen/Cover-Me/Archiv/Cover-Me-vom-16.08.2012

Weblink ändere