Pete Seeger
Dr Peter „Pete“ Seeger (* 3. Mai 1919 z Nöi York; † 27. Januar 2014 z Nöi York) isch en amerikanische Folk-Musiker gsi, wo mit sine Lieder e Hufe Friidens-, Gwärkschafts- und Freihäitsbeweegige inspiriert het.
Lääbe ändere
Dr Pete Seeger isch am 3. Mai 1919 z Nöi York uf d Wält choo. Si Vater isch dr Muusigwüsseschaftler Charles Seeger gsi und si Mueter d Giigeleerere Constance de Clyver Seeger (1886–1975) 1941 het er zämme mit em Woody Guthrie, Lee Hays und Millard Lampell d Almanac Singers gründet. 1946 isch er im Spiilfilm To Hear Your Banjo Play ufdräte und im Joor druf isch er bi dr Brodukzion vom Folk-Musical Dark of the Moon drbii gsi.
1949 het er zämme mit em Sänger Lee Hays, em Ronnie Gilbert und em Fred Hellermann The Weavers gründet. 1955 het er sich gwäigeret, vor em Komitee für unamerikanischi Umdriib vom McCarthy uszsääge und isch wäge däm zu zää Joor im Gfangnis verurdäilt worde. Er het äi Joor müesse absitze, isch aber 17 Joor lang vo de kommerzielle amerikanische Medie boykottiert worde.
Vo 1963 bis 1964 isch dr Seeger zämme mit sinere Frau Toshi uf Wältdurnee gange. 1969 het er ghulfe d Umwältschutzorganisazion Clearwater z gründe. 1972 isch si Buech The Incompleat Folksinger erschiine, wo e Standardwärk über die amerikanischi Folkmuusig worde isch. Anderi Publikazione si American Favorite Ballads (1960), The Bells of Rhymney (1964), How to Play the Five-String Banjo (1965) und Henscratches and Flyspecks (1973) gsi.
In de 1960er Joor het s Rönessans vo dr Folkmuusig gee und im Seeger sini Lieder für Friide, für d Gliichberächtigung vo de Schwarze und für d Emanzipazion vo de Arbäiter si vor allem bim junge Publikum populäär gsi.
Am 25. April 2006 het dr Bruce Springsteen e nöis Album mit em Ditel We Shall Overcome: The Seeger Sessions uusebrocht. Im Septämber 2008 het Appleseed Recordings s Album At 89 veröffentligt.
Dr Pete Seeger isch im Alter vo 94 am 27. Januar 2014 im ene Nöi Yorker Chrankehuus gstorbe.[1]
Bekannti Lieder vom Pete Seeger sin:
- Where Have All the Flowers Gone
- Turn! Turn! Turn!
- May There Always Be Sunshine
- My Rainbow Race
Zämme mit de Weavers het er komponiert bzw. arrangschiert:
- If I Had a Hammer
- Kisses Sweeter Than Wine
- I Got a Home in Dat Rock
- Wimoweh
Dr Pete Seeger isch dr Halbbrueder vo dr Folksängere und Liedermachere Peggy Seeger (* 1935) und dr Nöwöö vom Lüriker Alan Seeger (1888–1916).
Uszäichnige ändere
- 1993 – Grammy Lifetime Achievement Award
- 1994 – Kennedy-Briis
- 1996 – Ufnaam in d Rock and Roll Hall of Fame
- 1998 - War Resisters League Peace Award
- 2009 - Freemuse Award vo dr Menscherächtorganisazion Freemuse[2]
Litratuur ändere
- David King Dunaway: How can I keep from singing. Pete Seeger. Harrap, London 1985, ISBN 0-245-54261-2 (Biografii).
Filmdokumentazione ändere
- Jim Brown: Pete Seeger: The Power of a Song – Dokumentazion 2007, gsändet uf PBS in dr Räije American Masters am 26. August 2011 (Video, änglisch, 83 Min.)
Weblingg ändere
Commons: Pete Seeger – Sammlig vo Multimediadateie- Pete Seeger in de Internet Movie Database (änglisch)
- Songlexikon, Artikel zu 'May there always be sunshine' [1]
- Pete Seeger Appreciation Page (änglisch)
- Folk Magazin Sing Out (änglisch)
- Biografii uf Wasser-Prawda.de
Fuessnoote ändere
- ↑ Folklegende und Friedensaktivist. In: Der Tagesspiegel vom 28. Januar 2014 (abgrüeft am 28. Januar 2014).
- ↑ Archivierte Kopie. Archiviert vom Original am 24. September 2012; abgruefen am 29. Januar 2014.
|
Dä Artikel basiert uff ere fräie Übersetzig vum Artikel „Pete_Seeger“ vu de dütsche Wikipedia. E Liste vu de Autore un Versione isch do z finde. |