Peter Bieri

Dr Peter Bieri (* 23. Juni 1944 z Bärn), as Autor under em Psöidonüüm Pascal Mercier bekannt, isch e Schwizer Schriftsteller und Filosoof.

Uniwersitääri Karriere

Dr Bieri het z London und Häidelbärg Filosofii, Änglistik und Indologii studiert. Er het under em Dieter Henrich und Ernst Tugendhat bromowiert über d Filosofii vo dr Zit. Noch em Doktorat het dr Bieri as wüsseschaftlige Assistänt am Filosofische Seminar vo dr Uniwersidäät Häidelbärg gschafft.

Dr Bieri isch bi dr Gründig vom Forschigsschwerpunkt Kognition und Gehirn vo dr Dütsche Forschigsgmäinschaft drbii gsi. D Schwerpünkt vo sinere Forschig si die Filosofischi Psüchologii, d Erkenntnistheorii und d Moralfilosofii gsi. Vo 1990 bis 1993 isch er Brofässer für d Gschicht vo dr Filosofii an dr Uniwersidäät Marburg gsi; ab 1993 het er as Noochfolger vom Ernst Tugendhat Filosofii an der Freije Uniwersidäät Berlin am Leerstuel für Sproochfilosofii underrichdet. 2007 het sich dr Bieri vorzitig lo bangsioniere, wil en dr Uniwersidäätsbetriib verergeret het.

Dr Schriftsteller

Under em Psöidonüüm Pascal Mercier het dr Peter Bieri bis jetz vier Romän veröffentligt: Perlmanns Schweigen (1995), Der Klavierstimmer (1998), Nachtzug nach Lissabon (2004; 2013 verfilmt) und Lea (2007). Im Joor 2006 het er für si literarischs Wärk dr Marie-Luise-Kaschnitz-Briis überchoo.

Wärk

• Pascal Mercier: Perlmanns Schweigen. Albrecht Knaus, Münche 1995. ISBN 3-442-72135-0
• Pascal Mercier: Der Klavierstimmer. Albrecht Knaus, Münche 1998. ISBN 3-442-72654-9
• Peter Bieri: Das Handwerk der Freiheit. Hanser, Münche 2001. ISBN 978-3-446-20070-8
• Pascal Mercier: Nachtzug nach Lissabon. Hanser, Münche 2004. ISBN 3-446-20555-1
• Pascal Mercier: Lea (Novelle). Hanser, Münche 2007. ISBN 978-3-446-20915-2
• Peter Bieri: Eine Art zu Leben. Hanser, 2013. ISBN 978-3-446-24349-1

Fuessnoote

Dä Artikel basiert uff ere fräie Übersetzig vum Artikel „Peter_Bieri“ vu de dütsche Wikipedia. E Liste vu de Autore un Versione isch do z finde.