Rafael Alfaro Kotte

Dr Rafael Alfaro Kotte (* 19. Septämber 1962 z Dortmund; † 16. Septämber 2005 z Fryybeg) (au "Ratzel Alfhardt" gnännt) isch e dytsche Akkordeonischt un Komponischt gsi.

dr Rafael Alfaro Kotte bi me Ufdritt im „Litfass“ z Fryybeg, 2004

Läbe

Dr Alfaro Kotte isch Suhn vun eme spanische Gaschtarbeiter un ere dytsche Mueter gsi un isch z Weener/Oschtfriisland ufgwagse. Syy Nochnamme Alfaro Kotte chunnt vu dr spanische Nammedradizion, wu jede zwe Nochnämme het, ein vum Vater ('Alfaro') un ein vu dr Mueter ('Kotte'). Dr Alfaro Kotte isch zweisprochig ufgwagse mit Spanisch un Hochdytsch. Vu syyne Klassekamrade un Frynd het er aber au s oschtfriisisch Plattdytsch glehrt, wun er guet het chenne schwätze un au z Fryybeg gärn mit Plattsprächer gschwätzt het.

Aafangs 1980er Johr isch er uf Fryybeg zoge go dert studiere. Dr Alfaro Kotte het verschideni Fächer studiert an dr Universitet Fryybeg (insgsamt 28 Semeschter), schließli het er s Studium mit em erschte Staatsexame fir s Lehramt fir Gymnasie (Fächer Dytsch un Spanisch) abgschlosse. Wel mer z Bade-Wirttebärg d Fächerkombination Dytsch un Spanisch nit fir s Lehramt zuegloo isch, isch er Ändi 1998 fir s Referendariat uf Brandeburg uf Potsdam gange, wun er as Referändar unterrichtet het. Är het syy Referendariat nit abgschlosse, isch statt däm aafangs 2001 wider uf Fryybeg zruckchuu un het as Taxifahrer un Privat-Spanischlehrer gschafft, schließli as frejschaffende Musiker un Komponischt.

Mit syyre langjehrige Partneri Sabine Braun (* 1965) vu St. Peter het dr Alfaro Kotte zwo Dechtere gha, Maren (* 1990) un Laura (* 1993).

Anne 2005 isch dr Alfaro Kotte an eme Härzinfarkt gstorbe.

Musik

Bi syym Großvater, Paul Siegfried Gottfried Kotte, het er vu 1972 bis 1981 Piano-Akkordeon, Klavier un Kompositionslehr glehrt, derzue klassischi un Flamenco-Gitarre im Sälbschtstudium. Syter anne 1977 het er Stuck fir Gitarre, Akkordeon un Klavier komponiert. Syy Musik het e europäischi Melodiifierig mit harmonisch-barocke Böuprinzipie verbunde, isch au au vilmol spanisch-orientalisch gfärbt gsi. Starki Yyfliss het s in syyre Musik gee vu Stremige us dr internationale Volksmusik, wie z. B. Musette, Tango, Polka usw.

Z Fryybeg het er iber d Johr mit vile Fryybeger Musiker gspilt, dr Alfaro Kotte isch bekannt gsi in s gsamte Chinschtlerszene. 1989 het er fir s Wallgrabe-Theater z Fryybeg d Musik zuen eme Theaterstuck komponiert un musiziert, syyni Kompositione mit Akkordeon het er vil Johr immer wider bi Uffierige vum Chinder- un Jugedtheater Fryybeg gspilt. Anne 1990 het er zue dr Ereffnig vum Stadttheater Pforze gspilt. Syy greschte ufdritt isch uf em Feschtakt z Stuegert 1991 gsi zum 80. Geburtstag vum friejere Formel 1-Wältmeischter Juan Manuel Fangio, wun er Tango gsunge het zämme mit em argentinische Bandoneonischt Miguel Fernández

1996 het er mit em Franz Lindlar un em Jürgen Sutter zämme s Trio Solfeo grindet. Wun er z Brandeburg gwohnt isch, het er chinschtlerischi Kontakt gchnipft zum Potsdamer Moler Gerhard Gampfer. Syyni Kompositione sin vu dr Carmen Hey gspilt wore unb vu dr Folkgruppe HotelOst (Mainz). Fir s Figuretheater Laura Anderland vu dr Fryybeger Chinschtleri Anne Thaler het er d Begleitmusik komponiert. Anne 2004/05 er d Filmmusik komponiert fir dr Film Liebende - der Film vum Raphael Maria Büchel, e Deil vu dr Musik het er au sälber yygspilt mit em Akkodeon bzw. em Klavier.

Grupo Solfeo

Dr Grupo Solfeo (spanisch solfeo: 'solfeggiere' oder 'no Notte musiziere') isch anne 1996 z Fryybeg um dr Alfaro Kotte unter em Name "Trio Solfeo" entstande. In dr Ursprungsbsetzig isch s Trio Solfeo us em Alfao Kotte, em Gitarrischt Franz Lindlar (bis 2002) un em Kontrabassischt Jürgen Sutter (bis 2001) bstande. 2000/01 het sich d Gruppe um dr Gyyger Thomas Zipp un dr Bassischt Arnd Schröder erwyteret. E Zytlang sin dr Alfaro Kotte, dr Thomas Zipp un dr Arnd Schröder au as Trio Melange ufdrätte. Syt 2001 het d Gruppe in dr Bsetzig Alfaro Kotte, Akkordeon, Katharina Mlitz-Hussain, Violine un Johannes Büttner, E-Bass, gspilt, jetz unter em Namme Grupo Solfeo. Im Johr 2003 het dr Grupo Solfeo syy erschti un einzigi CD, Ansia (span. 'Sehnsucht'), uusebrocht. Noch em Dod vum Alfaro Kotte anne 2005 het sich d Gruppe ufglest. D Mlitz-Hussain un dr Büttner spile scho syter anne 1999 unter em Name Collegium Ducale zämme.

D Musik vum Grupo Solfeo het sich doderdur uuszeichnet, ass si uusschließli Kompositione vum Alfaro Kotte gspilt gha het. D Musik isch bregt gsi vu Musette, Walzer, Tango, Csárdás, Polka un andere Stremige vu dr europäische Volksmusik.

Musiker:

• Rafael Alfaro Kotte, Akkordeon, Gitarre
• Franz Lindlar, Gitarre
• Jürgen Sutter (* 1970), Kontrabass
• Thomas Zipp, Violine
• Arnd Schröder (* 1960), Kontrabass, E-Bass
• Katharina Mlitz-Hussain (* 1968), Violine
• Johannes Büttner (* 1969), E-Bass, Klavier, Posaune, Tuba

Dondreger CD:

• Grupo Solfeo "Ansia" 2003

In ere Rezension vu dr Badische Zeitung vum Frytig, 27. Juni 2003 het s doderzue in dr Rubrik CD-TIPP gheiße:

Weltreise in 18 Miniaturen: Grupo Solfeo mit "Ansia". Vom Großvater in Ostfriesland hat er seine Akkordeonkünste, das spanische Erbe führte ihn später als Autodidakt zur klassischen und Flamenco-Gitarre. Iberischer Funke und friesische Kühle - geht das? In Rafael Alfaro Kottes Kompositionen lassen sich noch weit mehr Folklore-Anspielungen auf befruchtende Beziehungen ein. Mit seinem Trio bewandert der Wahlfreiburger in 18 Miniaturen spielfreudig die Weltkarte. Unterstützt durch die mal feurige, mal melancholisch seufzende Violine von Katharina Mlitz-Hussain und den soliden Begleitbass von Johannes Büttner geleitet er uns durch 1001 Nacht. Ahnungen der schweren russischen Seele schleichen sich ein, ein munterer Musette-Walzer dreht sich, Klezmer und ungarische Stimmungen à la Brahms lassen grüßen, verschmitzt paaren sich Tango-Versatzstücke mit klassischen Bausteinen.

Weblink

• Grupo Solfeo uf archive.org
• Liebende – Der Film uf fudder.de
• Collegium Ducale