Hauptmenü ufmache
Dialäkt: Baseldütsch

D Schützematte isch e groosses Sportareaal in dr schwizerische Stadt Basel. Es befindet sich im Bachlätte-Kwardier, an dr Gränze zum Gotthälf-Kwardier und zum Ring-Kwardier. Es wird begränzt dur s Schützehuus, dr Bundesblatz und die bäide Hauptstroosse Nöibaadstrooss und General-Guisan-Strooss.

Dr Sportblatz Schützematte

D Schützematte isch in zwäi Areaal iidäilt: Dr östligi Däil bestoot us em Schützemattpark, eme öffentlige Freizit- und Sportpark mit ere groosse Matte, Böim zringsum und eme Restorant (e Bawillion, wo früener emol abebrennt isch). Im westlige Däil si s Stadion Schützematte, wo s Häimstadion vom BSC Old Boys Basel isch, und witeri Sportblätz für Liichtathletik, Schutte und Dennis. Zwüsche de bäide Areaal goot d Brennerstrooss duure.

GschichtBearbeite

D Schützematte isch für sportligi Aktividääte scho im 15. Joorhundert brucht worde, wo s Gebiet vo dr Gsellschaft vo de Füürschütze as Schiessblatz zum Büggseschiesse brucht worde isch. Die Schiessveraastaltige häi mit dr Zit festligi Züüg überchoo, und eso het sich d Schützematte au zum ene dradizionelle Festblatz entwicklet. Under anderem het dört 1827 s Äidgenössische Eer- und Freischiesse stattgfunde, 1844 s Äidgenössische Schützefest und d 400-Joor Fiir vo dr Schlacht vo St. Jakob, 1879 s Äidgenössische Schützefest, 1886 s Äidgenössische Durnfest, 1909 s Äidgenössische Muusigfest und im Joor 1912 s Äidgenössische Durnfest.

D Schützematte isch in de Joor 1875/76 an d Iiwoonergmäind choo und 1899 het mä e nöije Schiessstand am Allschwiler Weijer ufdoo und das isch s Ändi gsi vo dr Gschicht vo dr Schützematte as Schiessblatz. S Areaal isch vo denn aa für verschidnigi sportligi und kulturelli Zwäck brucht worde.

WeblinggBearbeite