Schattespiil

es Theater, wo me mit Schätte d Figure macht

S Schattespiil isch en Aart vom Theater, wo me drby mit Schätte uf emene Tuech e Gschicht verzellt. Me zelt’s meischtens zu dr Kategory vom Figuuretheater.

Chinder mache es eifachs Schattespiil
e Wayang-Figur

D Lüüt wo däm Theaterstuck zueluege, sitze vor ere wysse Stoffwand, won e Techniker vo dr andere Syte mit Liecht tuet aalüüchte.

Vor däm Liechtstraal zeigt dr Schattespiiler denn mit Forme, wo a Stääb agmacht sind, syni Gschicht: Me meint, d Figuure chöme uf d Büüni und machen öpis, si träffen anderi und erläbe gfäärlechi Abentüür, wenn us em Hindergrund öpe wildi Dier ufdauche; je nachdämm wie dr Spiiler d Figuure het, ob nooch bim Tuech oder eender nooch bi dr Lampe, sind d Schattebilder chlyner oder grösser, und so cha mer vil läbigeri und dramatischeri Szeene uf s Tuech zeichne weder wemme d Figuure diräkt gsuchti.

D Forme für s Schattespiil cha mer us Karton oder Läderpladde mache, und denn isch dr Schatte eifach dunkel. Vil Schattespiiler mache d Figuure deils halb durchsichtig, und die chönd sogar gfärbt sy, und bim modärne Spiil nimt me mängisch grad farbegi Foolie und no anderi Hilfsmiddel, und denn git das uf em Tuech ganz farbegi und fantasteschi Bilder.

Bi de berüemptischte Tradizioone vom Schattetheater sind s Wayang, wome z Indonesie spiilt, und s Píyǐngxì z China. I dr nöiere Zyt het me die Kunscht au uf Öiropa brocht, wo si under em französische Name ombres chinoises beliebt gsi isch. Z Hannover git’s regelmässig s Festival vom Schattetheater. S eerschte sötige Festival isch ane 1988 z Schwäbisch Gmünd gsy. 2015 und 2016 het s Lindenmuseum z Stuttgart en Uusstellig über d Gschicht vom Schattetheater gmacht.[1]

Literatur ändere

  • Georg Jacob: Die Geschichte des Schattentheaters im Morgen- und Abendland. 2. Uuflaag, Hannover 1925, Nachdruck 1972. ISBN 978-3764804114
  • Jasmin Ii Sabai Günther, Inés de Castro (Hrsg.): Die Welt des Schattentheaters. Von Asien bis Europa. Katalog Linden-Museum. München 2015. ISBN 978-3-7774-2482-8.

Weblink ändere

  Commons: Schattenspiel – Sammlig vo Multimediadateie

Fuessnoote ändere

  1. Die Welt des Schattentheaters. Ausstellungstexte. Linden-Museum, Stuttgart