Schluchtèschteig
Dè Schluchtèschteig isch èn Fernwanderwäg durch dè Süèdschwarzwald vo Stüèlingè nõch Wäär. Dè 118 Kilometèr lange Wäg isch in sechs Dagesetappè ydeilt. Di bescht Wanderzit isch vum Mai bis Novembèr; mit èm erschtè Schnee wörd sini Begehig bsunders i dè gächè Schluchtabschnitt nimmi empfellenswärt, a bsunderè Stellè wiè z. B. Wuètè-Flüè odder -schlucht sogar lèbensgföhrlich.
| Schluchtèschteig | |
|---|---|
 Dè Wäg füürt am bekanntè Dom z St. Bläsy vorby | |
| Datè | |
| Längi | ca. 118 km |
| Laag | Dütschland, Badè-Württèbärg, Süèdschwarzwald |
| Betreut durch | Schwarzwaldvorein |
| Markyrigszeichè | Stilisyrtè Flusslauf mit Bärg un Dal |
| Startpunkt | Stüèlingè 47° 44′ 48,8″ N, 8° 27′ 4,8″ O |
| Zylpunkt | Wäär 47° 37′ 27,6″ N, 7° 54′ 13,7″ O |
| Tùp | Fernwanderwäg |
| Högschstè Punkt | Bildschtei (1.134 m) |
| Nidrigschtè Punkt | Wäär (350 m) |
| Schwirigkeitsgraad | lycht |
| Johreszit | Summer |
| Mönet | Mai–Septembèr |
| Ussichtspünkt | Uussichtsdurm Lehèchopf |
| Bsunderheitè | Wuètèschlucht Prädikaatswanderwäg |
Dè Schluchtèschteig isch durchgängig beschilderèt. A dè Wägchrützigè isch er mit èm Schluchtèschteigsûmbòl un èm Rautèwägzeichè vom Schwarzwaldvorein kennzeichnèt, wo denn au uff dè Abschnitt zwischè dè Wägchrützigè aabrocht isch. Dè Schluchtèschteig erfüllt d Kriteriè von èm Prädikat „Qualitätsweg Wanderbares Deutschland“. Übber 50 Prozènt vo dè Streggi volaufed uff natùrbelòènè Wäg, lediglich 16,4 Brozènt vo dè Streggi sin asphaltyrt. Diè Wanderbeschilderig wörd durch d Ortsgruppè vom Schwarzwaldvorein sichergschtellt.
Gschichtè ändere
Dè Schluchtèschteig isch als Kooperationsbrojèkt, an dem alli Gmeindè entlang dè Wanderroutè, dè Schwarzwaldvorein, dè Trägervorein vom Naturpark Südschwarzwald un d Schwarzwald Tourismus GmbH beteiligèt gis sin. D Wanderstreggi isch 2006 brojèktyrt un 2007 aaglait un uusgschilderèt worrè; 2008 isch dè Schluchtèschteig mit èrè offizièllè Yweihig am 5. Juni i sini èrschti Saison gangè. Diè alli drei Johr notwendigi Nõchzertifizyrig als Prädikatswanderwäg isch am 13. Januar 2011 erfolgt.[1]
Kurzbeschrybig ändere
Mit èrè Längi vo 118 km volauft dè Schluchtèschteig vo Stüèlingè durch d Wuètèflüè, Wuètèschlucht un übber Länzkirch zum Schluchsee. Er passyrt dè Dòm vo St. Bläsy, übberqueert diè hügelig Hochflächi vom Dachsbärg un Ibach un windet sich schlieèlich vo Todtmoos durch s Weeradal èm Zyl z Weer entgegè.
Sehenswärt entlang vo dè Streggi sin bsunders:
- s Nadurschutzgebièt Wuètèschlucht, wo scho 1939 als söttiges uusgwisè worrè isch,
- s Flusschraftwärk vo Stallegg, s älteschte Chraftwärk vo Badè.
- dè Schluchsee, gröschtè See vom Hochschwarzwald,
- dè Dòm vo St. Bläsy,
- s Hochdal un d Hochmoor bi Ibach.
Tagestourè / Etappè ändere
Erschti Etappè: Stüèlingè – Blummbärg ändere
Übbersicht ändere
- Dischtanz: 19 Kilometèr
- Wanderzit: ca. 5,5 Stundè
- Schwirigkeit:
| Ort/Sehenswürdigkeit | Streggi (km) |
Höchi (m ü. NN) |
Witeri Informationè |
|---|---|---|---|
| Stüèlingè | 0 | 456 | Chrützig mit èm Oschtwäg Pforzè-Schafuusè |
| Dalbaanhof Wizè | 4,0 | 471 | Baanhof vo dè Sauschwänzlebahn, èm Mittelabschnitt vo dè stillglaitè Wuètèdalbaan Chrützig mit èm Oschtwäg |
| Gaschthuus Wuètèschlucht | 4,0 | 501 | Haltepunkt Luusè-Blumegg vo dè Sauschwänzlebahn |
| Uussichtspunkt Wuètèflüè | 4,0 | 621 | |
| Ottilièhöchi | 3,0 | 800 | Chrützig mit dè Schwarzwald-Querwäg Fryburg-Bodèsee |
| Buèchbärg | 1,0 | 886 | |
| Blummbärg | 3,0 | 704 | Chrützig mit èm Oschtwäg Chrützig mit èm Schwarzwald-Querwäg Fryburg-Bodèsee |
Wägbeschrybig ändere
Dè Schluchtèschteig fangt am Baanhof z Stüèlingè a dè dütsch-schwizerischè Gränz aa. Am Ortsuusgang bi Obberwisè drènnt sich dè Wäg vom Oschtwäg Pforzè-Schafuusè, wo èwäg vo dè Wuètè zum Baanhof Wizè füürt. Dè Schluchtèschteig biègt nõch rächts ab un volauft entlang dè Wuètè zum Baanhof Wizè, èm Èndbaanhof vo dè Sauschwänzlebaan, welli sit 1977 nu no als Museumsbaan gnutztè wörd. Ab èm Baanhof volauft dè Schluchtèschteig un dè Oschtwäg uff dè glychè Streggi. Am Gaschthuus "Im Wyler" bim ehemõligè Haltepunkt Luusè-Blomegg i dè Nôchi vom Stüèlinger Ortsdeil Grimmelzofè füürt dè Wanderuäg i d Flüè iè. Bi dè Ysebaabrugg im Blomegger Wyler wörd d Wuètè übberquert. Denõch füürt dè Wäg als schmalè Pfad langsam berguff durch s Nadurschutzgebièt Wuètèflüè vorby am Monnèmer Flüè un èm Sturzdobèl bis zum Uussichtspunkt Wuètèflüè, wo sich kurz devor dè Oschtwäg un dè Schluchtèschteig drènnèd. Vorby an èm Wanderparkblatz füürt d Streggi kurz uff èm Wellblèchwäg unter dè Baanlinniè drunter durrè un denn nõch links èwäg vo dè Strõõß uè zu dè Ottilièhöchi, wo dè Wäg uff dè Querwäg Fryburg–Bodèsee drûfft. Denõch gôt s witer bärguff bis zu dè Gipfelhüttè vom Buèchbärg. Vo dört füürt d Wanderung znägscht gäch abbèzuès Richtig Blummbärg, übber d Fridhofstrõõß wörd sell Zyl erreicht.
Zweiti Etappè: Blummbärg – Schattèmülli ändere
Übbersicht ändere
- Dischtanz: 20 Kilometèr
- Wanderzit: ca. 6,5 Stundè
- Schwirigkeit:
| Ort/Sehenswürdigkeit | Streggi (km) |
Höchi (m ü. NN) |
Witeri Informationè |
|---|---|---|---|
| Blummbärg | 0 | 704 | |
| Achdorf | 2,5 | 540 | Ortsdeil vo Blummbärg Chrützig mit èm Oschtwäg Chrützig mit èm Quèrwäg Fryburg–Boddèsee |
| Aselfingè | 1,0 | 540 | |
| Wuètèbrugg | 0,5 | 540 | |
| Wuètèmülli | 4,0 | 570 | |
| Gauchachmündig | 1,0 | 580 | |
| Wuètè-Vosickerig | 4,0 | 600 | |
| Schurhammerhüttè | 1,0 | 610 | Diè offeni Schutzhüttè isch benamst nõch èm Hermann Schurhammer, èm Initiator vom Nadurschutzgebièt Wuètèschlucht |
| Ehemõliges Kùrhotel Bad Boll | 3,0 | 620 | |
| Diètfurt-Brugg | 1,0 | 634 | |
| Schattèmülli | 3,0 | 659 | Gaschthof |
Wägbeschrybig ändere
Z Blummbärg drènnt sich dè Schluchtèschteig vom Quèrwäg Fryburg-Boddèsee. Er füürt zum Deil übber Stegè un Leitèrè durch diè chly Schlucht vom Schleifèbach an èm Wasserfall vorby zrugg zu dè Wuètè, wo kurz vor Achdorf wiidder erreicht wörd. Z Achdorf chrützt sich dè Wög erneut mit èm Oschtwög un èm Quèrwäg Fryburg-Boddèsee. Vo Achdorf bis zu dè Wuètèmülli isch dè Dalboddè breit. Bis Aselfingè volauft dè Schluchtèschteig rächts vo dè Wuètè, wôrend dè Quèrwäg links vo dè Wuètè uusgschilderèt isch. Kurz hinter Aselfingè bi dè Wuètèbrugg kömmed beidi Wäg widder zämmè un volaufed denn gmeinsam links vo dè Wuètè. D Wuètèmülli, wo nõch öppè vir Kilometèr erreicht wärd, isch hüt nu no è Sägewärch. Dè ehemõlige Gaschthof isch unbewûrtschaftet; am Waldparkblatz uff dè anderè Sitè vo dè Wuètè befindet sich allerdings èn Kiosk. Ab dè Wuètèmülli wörd s Dal widder èng un schluchtartig. Dè Wäg füürt vorby a dè Gauchachmündig, bi wellerè dè Fluss uff enèrè überdachtè Holzbrugg übberquert wörrè cha. D Schluchtèschteig blybt abber znägscht links vo dè Wuètè, wechslèt abber nõch èm Wuètèuustritt uff diè rächti Flusssitè, bevor s am Rümmeleschteeg widder zrugg uff diè link Flusssitè gòòt. Am Wuètèuustritt flüèßt s knapp drei Kilometèr flussobsi vosickernde Wassèr widder uss èm Bärg. Nõch dè Wuètèvosickerig gòòt dè Wäg witer durch diè èngi Schlucht vorby a dè Schurhammerhüttè un witer zum ehemõligè Hotel Bad Boll, welles 1992 abgrissè worrè isch. Diè ehemõligi Kapellè isch no vorhandè. Witer füürt d Wanderig bim ehemõligè Diètfurt-Hòf übber d Diètfurt-Brugg bis zu dè Schattèmülli.
Dritti Etappè: Schattèmülli – Obberfischbach ändere
Übbersicht ändere
- Dischtanz: 18 Kilometèr
- Wanderzit: ca. 6,5 Stundè
- Schwirigkeit:
| Ort/Sehenswürdigkeit | Streggi (km) |
Höchi (m ü. NN) |
Witeri Informationè |
|---|---|---|---|
| Schattèmülli | 0 | 659 | |
| Ygang zum Lotèbachklamm | 0,0 | 660 | |
| Räuberschlössle | 2,5 | 720 | |
| Flusschraftwärk Stallegg | 2,0 | 702 | |
| Rötèbachmündig | 1,0 | 715 | |
| Haslachmündig | 1,5 | 720 | Zämmèfluss vo Haslach un Guètach zu dè Wuètè |
| Rèchèfelsè | 1,5 | ||
| Baanhof Kappel-Grüèwaald | 1,5 | 807 | Ehemõligè Baanhof vo dè 1976 stillglaitè Baanschtreggi Länzkirch-Bõõdorf Chrützig mit èm Quèrwäg Fryburg-Boddèsee |
| Länzkirch | 4,0 | 808 | Chrützig mit èm Mittelwäg Pforzè-Waldshuèt |
| Fischbacher Höchi | 4,5 | 1.110 | Uff dè Fischbacher Höchi lyt èn wunderschöne Grillblatz mit Hüttè (mit Stròmaaschluss un Küülschrank) sowiè èn Bolzblatz. |
| Oberfischbach | 0,5 | 1.045 | Deilort vo Schluchsee |
Wägbeschrybig ändere
Bi dè Schattèmülli isch dè Ygang zu dè Lotèbachklamm. Dè Schluchtèschteig gòt allerdings rächts im Waald d Haaldè uè un denn è Stugg ußerhalb vo dè Schlucht d Dalwangè bis zum Rand uè. D Schlucht wörd bald druff bim Räuberschlössle widder erreicht, èn Flüè übber dè Wuètè, uff demm sich im 14. Johrhundert d Burg Neu-Blumegg befundè hèt. D Wuètè flüèßt öppè zwei Kilometèr dehinter gu dè Stallegger Brugg übber d Stauschtufè vom Flusschraftwärk Stallegg. Sell Chraftwärk isch s älteschte Flusschraftwärk z Badè. Es hèt vo 1889 bis 1979 Stròm broduzyrt und isch 2000 widder reaktivyrt worrè. Denõch gòt s vorby a dè Mündig vom Rötèbach zu dè Mündig vo dè Haslach. Obsi vo dè Haslachmündig wörd d Wuètè als „Guètach“ bezeichnet. Nomòll übberquert è Brugg d Wuètè (Guètach), bevor dè Wäg s Wuètèdal volòtt un witer i d Haslachdobèl füürt. Übber dè Rèchèflüè un dè Höllochflüè erreicht dè Wäg d Trassè vo dè 1976 stillglaitè ehemõligè Baanschtreggi vo Kappèl gu Länzkirch, uff derrè irè Trassè gòt witer gu Länzkirch. Unterhalb vo Kappèl hinter èm ehemõligè Baanhof Kappèl-Grüèwaald drènnt sich dè Schluchtèschteig vom Schwarzwald-Querwäg Fryburg-Boddèsee. Dè Schluchtèschteig volòtt dehinter diè abbauti Baanschtreggi un füürt èm Müllibach nõch durch èn Dunnel unterhalb vo dè Baanschtreggi widder abbè zu dè Haslach. Denõch gòt s widder uè un nommòl übber d Streggi durrè zu dè Lochmülli un witer nõch Länzkirch. Ab Länzkirch volauft dè Schluchtèschteig durch dè Geopark è kurzes Stugg uff dè glychè Streggi wiè dè Mittelwäg Pforzè-Waldshuèt. Aaschlièßend gòt d Wanderig unterhalb vom Stöcklebärg uè un widder absi, im Schwendedàl witer i eim Rutsch uèzuès bis zu dè Fischbacher Hütte, vorby a dè Cyriakkapellè un èm Schwendehof. Ab dè Hüttè gòts gäch absi bis Obberfischbach, èm Deilort vo Schluchsee.
Virti Etappè: Obberfischbach – St. Bläsy ändere
Übbersicht ändere
- Dischtanz: 20 Kilometèr
- Wanderzit: ca. 6,5 Stundè
- Schwirigkeit:
| Ort/Sehenswürdigkeit | Streggi (km) |
Höchi (m ü. NN) |
Witeri Informationè |
|---|---|---|---|
| Obberfischbach | 0 | 1.045 | Deilort vo Schluchsee |
| Bildschtei | 3,0 | 1.134 | Uussichtspunkt |
| Aha | 1,5 | 936 | Deilort vo Schluchsee |
| Unterkrummèhof | 3,5 | 946 | Gaschthuus |
| Ehemõligi Krummèsägi | 2,0 | 1.065 | |
| Krummèchrützbrunnè | 1,5 | 1.150 | |
| Muchèland | 1,0 | Deilort vo Schluchsee | |
| Wittemlehüttè | 1,5 | 1.102 | |
| Blasiwald-Altihüttè | 1,5 | 1.088 | Chrützig mit èm Mittelwäg Pforzè-Waldshuèt Deilort vo Schluchsee St. Pantaleonskapellè |
| Sandgruèb | 1,0 | 1.080 | |
| Windbärghüttè | 1,5 | 850 | |
| Windbärg-Wasserfall | 0,5 | 835 | |
| St. Bläsy | 1,5 | 770 |
Wägbeschrybig ändere
Z Obberfischbach füürt dè asphaltyrte Bildschteiwäg vom Haus des Gastes hoch zum Waldrand un denõch witer durch dè Waald übber dè Koolplatz zum Bildschtei. Vo dört gòt s im Zick-Zack abbè zum Schluchsee, wellè bi Aha erreicht wörd. Dört unterquert dè Wäg znägscht d Baanlinniè vo dè Dreiseèbaan un denn d B 500, bevor er s Ufer vom See erreicht. Dè Wäg bygt nõch rächts ab un füürt am Seeufer nõch zum Unterkrummèhof uff dè anderè Sitè vom See nõch. Denõch füürt d Streggi durch dè Waald uff èm Muchèländerwäg übber d ehemõligi Krummèsägi, vorby am Krummèchrützbrunnè un zwischè m Oberè un Unterè Habsbärg durrè nõch Muchèland. Kurz vor dè Wittemlehüttè biègt dè Wäg links ab zum Raschtblatz Pfaffèbrünnle un füürt uff èm Waldwûrtschaftswäg un übber Albwisè abbè nõch dè Althüttè, wo dè Wäg nomòll uff dè Mittelwäg drifft un für öppè ein Kilometèr uff dè glychè Streggi mit ym zämmè volauft. Witer gòt s absi vorby a dè Sandgruèb, gäch absi uff èm Schotterwäg un denõch durch d Windbärgschlucht i s Dal vo dè Alb gu St. Bläsy, wo übber d Fridrichstrõß un d Albstrõß erreicht wörd.
Füüfti Etappè: St. Bläsy – Todtmoos ändere
Übbersicht ändere
- Dischtanz: 19 Kilometèr
- Wanderzit: ca. 6,5 Stundè
- Schwirigkeit:
| Ort/Sehenswürdigkeit | Streggi (km) |
Höchi (m ü. NN) |
Witeri Informationè |
|---|---|---|---|
| St. Bläsy | 0 | 770 | |
| Schwandbrünnele | 1,0 | 885 | |
| Lehèchopf | 1,5 | 1.039 | Uussichtsturm |
| Rüttèwys | 1,5 | 1.010 | Deilort vo Dachsbärg |
| Horbach | 1,5 | 990 | Deilort vo Dachsbärg |
| Kloschterweihèr | 0,5 | 950 | Ehemõligè Gaschthòf |
| Weeraquèllè | 9,0 | 1.060 | |
| Ibacher Chrütz | 1,0 | 1.055 | |
| Hochweeraschlucht | 0,5 | 820-1.030 | |
| Todtmoos | 0,5 | 802 |
Wägbeschrybig ändere
St. Bläsy wörd durch dè Kurgartè volõ. Vo dört füürt d Wanderig zum Luschthuusflüè. Bim Schwandbrünnele biègt dè Wäg links ab un füürt witer zum Uussichtsturm uff èm Lehenchopf. Vo dört füürt d Streggi übber Rüttèwys, wo d Chreisschtrõß 6527 übberquert wörd, un Horbach zum Kloschterweihèr. Vom ehemõligè Gaschthòf Kloschterweihèr gòt s berguff zu dè Fridrich-Auguscht-Gruèb, wo hüt als Spylbärgwärch ud Nadurschutzgebièt bruucht wörd. Nõchdèmm d Chreisschtrõß 6525 überquert wörd, gòt s witer am Obberibach vorby. Bald druff erreicht dè Wäg d Landesstrõß 150 un gòt öppè 500 Metèr a dè Strõß entlang. Nõchdem dè Wäg a d Ymündig vo dè Chreisstrõß 6525 d Strõß widder volõ hèt, volauft d Streggi an èm Gedenkschtei für d Waldflurbereinigung un a dè Weeraquèllè vorby, wo è Stugg èwäg vom Wäg lyt, zum Ibacher Chrütz. Dört wörd d Landesstrõß 150 übberquert un d Wanderig füürt witer durch s obbere Dal vo dè Weera absi gu Todtmoos, wo übber d St.-Bläsy-Strõß erreicht wörd.
Sechsti Etappè: Todtmoos – Weer ändere
Übbersicht ändere
- Dischtanz: 23 Kilometèr
- Wanderzit: ca. 7,5 Stundè
- Schwirigkeit:
| Ort/Sehenswürdigkeit | Streggi (km) |
Höchi (m ü. NN) |
Witeri Informationè |
|---|---|---|---|
| Todtmoos | 0 | 802 | |
| Schwarzèbach | 4,0 | 860 | Deilort vo Todtmoos |
| Zumkeller-Sägi | 2,5 | 695 | Sägewärch |
| Au | 1,0 | 690 | Deilort vo Todtmoos |
| Weeradalbrugg | 6,0 | 593 | |
| Weera-Stausee | 6,0 | 420 | Chrützung mit èm Hotzèwald-Querwäg |
| Weer | 3,5 | 366 | Chrützung mit èm Hochrhy-Querwäg |
Wägbeschrybig ändere
Vo Todtmoos uus füürt dè Schluchtèschteig vorby a dè Weerawald-Klinik übber dè Weihèrwäg zum Deilort Schwarzèbach. Vo dört volauft d Streggi übber dè aalte Hornwäg abbè zu dè Zumkeller-Sägi. Dört wörd d Landesschtrõß 148 übberquert un dè Schluchtèschteig drûfft widder uff d Weera un voeinigt sich mit èm Weeradalwäg. Kurz denõch biègt dè Wäg zèrscht links un denn gly widder rächts ab un füürt uff èm nadurbelõènè Pfàd vorby an èm Wildgehege bis nõch Todtmoos-Au. Hinter Au biègt d Streggi links ab i dè Schwandhaaldèwäg. S Dal wärd dõ äng un schluchtartig. D Streggi gòt znägscht ußerhalb vo dè Schlucht berguff bis zuè nèrè Spitzkeeri un denõch widder absi uff èn schmalè Pfàd obberhalb vo dè Weera a dè Haaldè nõch. Èn nadurbelõènè Pfàd füürt entlang von èm Bachlauf gäch abbè bis zu dè Landesstrõß 148. Dört wörd d Weera übber è aalti Steibrugg sowiè d Strõß übberquert. Dè Wäg stygt denn uff dè anderè Sitè widder gäch nõch obbè aa. Durch dè Waald wit obberhalb vo dè Weera volauft dè Wäg witer am Uusbligg a dè Felsèhüttè uff dè anderè Schluchtsitè vorby, bevor er widder absi zum Weera-Stausee füürt. Vor èm Stausee chunnt dè Wäg mit èm Hotzewald-Querwäg zämmè. Er übberquert d Staumuèr un füürt witer am Fluss nõch bis gu Weer.
Literadur ändere
- PublicPress Publikationsgesellschaft (Hrsg.): Schluchtensteig. Quer durch den Naturpark Südschwarzwald. Wanderkarte 1:25.000. Geseke 2008, 2. Auflage ISBN 978-3-89920-447-6
Weblinggs ändere
Commons: Schluchtensteig – Sammlig vo Multimediadateie- Offizièlli Homepage vom Wanderwäg
- Schluchtensteig – Wögbeschrybig, Streggèvolauf, Höchèbrofil un GPS-Tracks
Einzelnõchwys ändere
- ↑ Pressemitteilung (Memento vom 12. April 2013 im Internet Archive) Deutscher Wanderverband, 13. Januar 2011, abgruèfè am 18. Septembèr 2012 (PDF, 82 KB).
|
Dä Artikel basiert uff ere fräie Übersetzig vu dere Version vum Artikel „Schluchtensteig“ vu de dütsche Wikipedia. E Liste vu de Autore un Versione isch do z finde. |